STENBOL - Hemsereka DEM Partî ya Stenbolî Arîfe Çinar derheqê qerarê ke Komîteya Wezîran heqê hêvîye yê semedê Abdullah Ocalanî da ser o qisey kerd û va, demê ameyo dayîş heta hezîrana 2016ine û no dem derg o. Arîfe Çinar va: “Qerar biendîşe yo. Ganî qerarêk tesîr prosesî ser o keno bêro dayîş.”

 

Komîteya Wezîran ya Konseya Ewropayî (KWKE) qerarê xo yê derheqê “Koma Gurban” ke “Heqê hêvîye” yê Rayberê Şarê Kurdî Abdullah Ocalanî, Emîn Gurban, Civan Boltan û Hayatî Kaytan zî gêno mîyanê xo, da. Komîteya ke demê verê semedê eştişê gamanê serrêke dem dabî Tirkîya, reyke bîn heta Hezîrana 2026ine dem da Tirkîya.

 

Hemsereka Partîya Têduştî û Demokrasî ya Şaran (DEM Partî) ya Stenbolî Arîfe Çinar derheqê babete de ercnayîş kerd.

 

‘Qeraro ke komîte da biendîşeyîn o’

 

Arîfe Çinar dîyar kerd pêwa ke 2014ine de DMME’yî derheqê heqê hêvîye de qerarê binpaykerdişî dabî hema gamêke nêameya eştiş û va: "Ganî lezkî gamî bêrê eştiş. Binpaykerdişê heqan yê zîndanan her ke şino zêde beno. Ganî lezkî nê binpaykerdişî peynî bê. Qeraro ke komîte dayo, qerarêk ke ameyo dergkerdişî yo. Ma prosesêk muhîm de yê. Prosesêk wina de komîte qerar heta hezîrana 2026ine taloq kerd. No demêk derg o. Huqûqêk mîyanê dewletan de est o. Cayêk ke heqê merdiman esas nêgînê de ca gênê. Zîhnîyetêk serê binpaykerdişê heqan ameyo awankerdişî est o. Meseleya kurde bi azadîya Birêz Ocalanî mumkin o. Ganî Ocalan heqê hêvîye ra feyde bigîro. Qerarê komîteyî endîşeyîn o.”

 

‘Ganî qerarêk ke tesîrêk prosesî keno vejîyayîne’

 

Arîfe Çinar tewr peyîn wina va: “Abdullah Ocalan mîmarê prosesî yo. Komîsyon muhîm o la tena qîm nêkeno. Ganî lezkî vurnayîşê qanûnî bêrê kerdiş. Tirkîya de prosesêk muhîm est o. La hende dergkerdiş, gamê pozîtîfî nêeştî negatîf o. Ganî qerarêk ke tesîr prosesî sero bikerdêne, biameyîne dayîş. Tirkîya zî bixo ganî bizano ke heqê hêvîye est o. Semedê çareserîya meseleya kurdî ganî azadîya fîzîkî ya Abdullah Ocalanî pê bêro. Ganî semedê nê heqê hêvîye esas bêro girewtiş. Ganî komîsyon zî rolê ke keweno milê ci ser, bica bîyaro.”