MERKEZÊ XEBERAN- HDK û hemserekê pêroyî yê DEM Partî û DBP’yî bi munasebetê serrgêra qetilkerdişê Jîna Emînî yê 3. eşkerayî daye û vat ke felsefeyê “Cinî Cuye Azadîye / Jin Jîyan Azadî” bi xoverdayîşêko global.

 

Hemsereka Pêroyî ya Kongreya Demokratîkî Şaran, Hemsereka Pêroyî ya DBP’yî Çîgdem Kiliçgun Uçar, Hemsereka Pêroyî ya DEM Partî Tulay Hatîmogullari bi munasebetê serrgêra qetilkerdişê Jîna Emînî yê 3. yê eşkerayî daye.

 

Xoverdayîş sînoran derbaz kerd

 

Hemsereka Pêroyî ya DEM Partî Tulay Hatîmogullari zî hesabê xo yê medyaya dîjîtale ser o wina vat: “Xoverdayîşo ke bi porê Jîna dest pêkerd vera rejîmê meleyan pêroyê sînoran derbas kerd. Silamî seba cinîyanê ke seba azadîye vengê xo berz kenê.”

 

Têkoşînê Jîna yê azadîye

 

Hemsereka Pêroyî ya DBP’yî Çîgdem Kiliçgun Uçar nê çîyî vatî: “Her rejîmêko zordar ke azadîya cinîyan keno hedef, do hemverê xo de Jîna’yan bivînê. Têkoşînê piştîdaye yê cinîyan do hem Îran û hem zî serasnerê Rojhelatê Mîyanên de sîstemê îqtîdar ê camêrdan binfîno. Têkoşînê Jîna yê azadîye, seba ma pêşengî keno.”

 

Jîna bî sembolê xoverdayîşî

 

Hemsereka Pêroyî ya HDK'yî Meral Daniş Beştaş zî wina va: "Ez bi rêz û hesrete Jîna Emînî ke hîrê serrî verê Îran de amî kiştiş, yad kena. Jîna bî sembola xoverdayîşî hemverê zilmê rejîmêk bi zor û serdestîyê camêrdan. Kiştişê aye tenê semedê cinîyanê Îranî nê, la semedê bi mîlyonan cinîyan her hetê dinya ke waştişê azadîye kenê, hêzê têkoşînî da. Qîrînayîşê nê cinîyan, yê ke destûr nêdayî ke dest bidê tewrê yew têlek porê înan, sînoran derbaz kerd. O qîrayîş, bi sloganê 'Jin, Jiyan, Azadî', Rojhelatê Mîyanên heta Ewropa, Amerîkayê Latîn heta Afrîkayî veng da.”