AMED - Sereka Baskê Cinîyan ê CHP’yî Guler Koçyîgît, dîyar kerd ke cinî roj bi roje hetê sîstemê serdest ê camêrdan ra çin benê û va, çareserî rêxistinbîyayîşê cinîyan û vurnayîşê sîstemî mumkin o.

 

Şîdetê cinîyan ser her ke şino zêde beno û bi polîtîkayê bêcezaverdayîşî şikdarî cesaret gênê û sûcî dewam kenê. Nêzdîbîyayîşê sîstemî yê hemverê na babete zî bi antişê Peymana Stenbolî bî.

 

Sereka Baskê Cinîyan ê CHP’yî Guler Koçyîgît derheqê babete de qisey kerd.

 

‘Qetilkerdiş sîstematîk o’

 

Guler Koçyîgît dîyar kerd ke qetilkerdişê cinîyan sîstematîk o û va: “Ewro Amed de cinîyêke ameyîne  qetilkerdiş. Ma zaf xemgîn ê. Bi serran o nê welatî de cinî yenê qetilkerdiş. Nîmeyê serre de 130-134 cinî ameyî qetilkerdiş. Ganî dewlete tedbîrê cidî bigîro. Qetilkerdişê cinîyan zêde bî. Qetilkerdişê cinîyan normal yeno vînayîş. No tehlukeyêk pîl o. Ganî tu kes hemverê nê qetilkerdişan de bêveng nêmano.”

 

‘Cinî hetê kesê ke tewr nêzdîyê xo yê yenê qetilkerdiş’

 

Guler Koçyîgît bale ant polîtîkayê bêcezaverdayîşî ser û va: “Na babete de wezîfe keweno milê dewlete ser. Polîtîkaya bêcezayî hêz dana şikdaran. Cinî hetê kesê tewr nêzdîyê xo ra yenê qetilkerdiş. Mêrde, waşte û keye. Cinî hetê kesê ke ci ra bawer kenê ra yenê qetilkerdiş. Ma bi israr vanê ke ganî tedbîrî bêrê girewtiş. Ma sey CHP hîsgêr ê û wazenê hukmat lezkî vernîya nê bigîro û tedbîran bigîro. Hukmat antişê Peymana Stnebolî dir destekdayîşê xo yê semedê cinîyan zî ant.”