Rozerîn Gultekîn

 

STENBOL - Endama OHD'yî Arzu Eylem Kayaoglu muhîmîyê awankerdişê komîsyono ke do meclîs de bingehê qanûnî ser o bêro awankerdiş û eştişê gamanê qanûnî yê prosesê "Aştî û Komelê Demokratîkî" de ercnayîş kerd û va, "Ganî dewlete gamanê pozîtîf bierzo ke têkilîyêk newe yê bawerîya hembeş bêro awankerdiş."

 

No proses ke bi vengdayîşê tarîxî yê Rayberê Şarê Kurdî Abdullah Ocalanî 27ê Sibate de dest pêkerd, 11ê temmuze de dewam kerd. Koma Aştî û Komelê Demokratîkî herêma Şikefta Casenî ke dewa Silêmanîye ya Başûrê Kurdistanî ya, merasîmêk organîze kerd ke ci de çekî ameyî veşnayîş û îmhakerdiş. Dimayê merasîmî, Serekê Parlamentoyî Numan Kurtulmuş û temsîlkarê partîyê sîyasî 18ê temmuze de Parlamento de kombî û awankerdişê Komîsyonê Parlamentoyî ke destpêk de amebî pêşnîyazkerdiş, munaqeşe bikerê. Kombîyayîş de qerar ame dayîş ke komîsyon rasterast bi înîsîyatîfê Serekê Parlamentoyî bêro awankerdiş, bi rayîrê qanûndayîşî nê. Arzu Eylem Kayaoglu, avûkata Komeleya Huqûqnasê Azadîye (OHD), prosesê bîyaye ser o ercnayîş kerd.

 

'Awankerdişê komîsyonî bi qanûnî do netîceyê pozîtîf bido'

 

Arzu Eylem Kayaoglu va, "Sey OHD, ma mîyanê sazgehê muhîmî yê komel û şarê kurdî yê. Xeylêk rêxistinê komelê sivîlî û heqê merdiman, pêwa OHD, ameyî dawetkerdiş ke beşdarê prosesê komelkerdişê prosesê aştî û komelê demokratîkî bibê. Çîyêk bîyayîşê ma uca ra xozayêr nîyo. Ma sey hemserek beşdar bî. Şîyayîşê uca sozêk o ke ma her çîyê ke destê ma de yo bikerê ke Tirkîya demokratîk bikerê. Ma hêvî kenê ke prosesê bi eşkerayîya ucayî peynî nêbena û dewlete tewr lez game bierzo. Ma qalê komîsyonêk kenê ke do nê prosesî bi temamî awan bikero û komelî bikero, rêziknameyê qanûnî yê lazimî komê xo yê xebate û komîteyê xo de munaqeşe bikero, rêziknameyê qanûnî bica bîyaro, gamê sîyasî û demokratîkbîyayîşî misoger bikero. Nê semedî ra zaf muhîm o. Ganî dewlete gamanê pozîtîfî bierzo ke têkiliyêk newe yê bawerîya hembeş bêro awankerdiş."

 

Garantîyê qanûnî yê komîsyonî

 

Arzu Eylem Kayaoglu, dewam de wina va: "Komîsyonêk bi hawayêko qanûnî ameyo awankerdiş do semedê her kesî beşdar bîyê garantîyê qanûnî peyda bikero, la eynî wextî de do tesdîq bikero ke no proses bi hawayêko qanûnî asayîş o. No eşkeno bibo proseso yewin ke hetê dewlete ra bi hawayêko qanûnî bêro destnîşankerdiş. Demê verî yê 2013-2015ine de, rêziknameyêk qanûnî yê 12-13 madeyan ame vetiş, la o zaf sînordar bi. Şima zanê ke prosesê verê de çi qewimîya. Muhîm o ke prosesê bingehêk ci yê qanûnî bibo ke reyke bîn nê dir rî bi rî nêmano. Sewbîna, çîyo ke Îmraliyî de ame bicakerdiş ke ma bi serran o hemverê ci de vejênê, rejîmêk înfazî yê cîyakar û bi temamî cîya yo."