MÛŞ - Sekretera Cinîyan a SES'î ya Mûşî Sevda Arslan derheqê problemê nêweşxaneyê dewlete yê Mûşî de qisey kerd û va, Mûş dayeyê welidnayîşî de rêza çarine de yo la beşê welidnayîşê cinîyan çin o û va, xizmetê weşîye qels ê.

 

Seranserê Tirkîya de krîz her ke şino giran beno û tewr zêde zî tesîr wareyê weşîye keno. Nêweşxaneyê Dewlete yê Mûşî de, qelsîya xebatkaran, binesazgeh û problemê sîstemê randevu bi hawayêko cidî nêweşî û kedkarê weşîye dano zorî. Sekretera Cinîyan a Sendîkaya Kedkarê Xizmetê Weşîye û Komelî (SES) Sevda Arslan derheqê babete de qisey kerd û va, weşîye êdî heq nê sey luks yena vînayîş.

 

‘Prosesê dermankerdişî bi sînor o’

 

Sevda Arslan wina va: “Nêweşî nêeşkenê randevu bigîrê. Sewqê semedê teberî zêde yê. Profîlê nêweşan zaf cîya yê. Xoresnayîşê nêweş û hedîseyan zehmet o. Nê semedî ra xeylêk kesî sewqê bajaranê bînan yenê kerdiş. Hûmara doktoran kêmî ya. Prosesê dermankerdişî bi sînor o. Nê semedî ra zî teşhîskerdişê nêweşan û dermankerdişan bi sînor o.”

 

‘Cinî nêeşkenê xo biresnê heqê weşîye’

 

Sevda Arslan dîyar kerd ke bi taybetî cinî nêeşkenê xo biresnê heqê xizmetê weşîye û va: “Nêeşkenê randevuyan bivînê. Serê MHRS’yî de zî nêeşkenê bivînê. Nêweşxane de kewenê dore. Serê sibayî saete 04.00ine de yenê kewenê dore. Hûmara xebatkaran zî kêmî ya. Nêweşê ke herêmanê dûran ra yenê zehmetîyê pîlan ancenê. Merdimê ke dûrî ra yenê, reyke di rey yenê dima ra fek ci ra vera danê. Vanê ke ma randevu nêvînenê û her tim taloq kenê.”

 

‘Nêweşxaneyan de beşê welidnayîşê cinîyan çin o’

 

Sevda Arslan bale ant qelsîyanê sîstemê weşîye yê Mûşî ser û wina va: “Nêweşxaneyê dewlete yê Mûşî de beşê welidnayîşê cinîyan çin o. Welat de Mûş hetê welidnayîşî de rêza çarine de yo. La çi heyf serwîsa welîdnayîşê cinîyan çin o. Beşêk semedê cinîyan çin o. Nêweşxaneyan de her branşê doktorî zî çin ê. Nêweşxaneyê ma bi rastî zî qels ê. Eynî wextî de ganî perwerdeyê plansazîyê keyeyî zî bêro kerdiş.”