MERSÎN- Mehtap Sert dîyar kerd ke 10ine pakêta hukmî de derheqê tepişteyanê sîyasîyan de yew vatişêk nêameyo vatiş û va: “Roja sozê derheqê prosesî de ameyê dayîş heta nika tahliyekerdişê 312 tepişteyan karêk asan bî. La no nêame kerdiş. Tepişteyê sîyasî teberê nê qanûnî de ameyê girewtiş.”

 

Binpaykerdişê heqê tepişteyan dewam kenê. Bi raporê ATK’yî heqê dermankerdişê tepişteyanê nêweşan yeno astengkerdiş, tahliyeyê înan yeno astengkerdiş. Endama Komeleya Heqê Merdiman (ÎHD) Mehtap Sert, binpaykerdişê heqan yê tepişteyî ciwîyenê û pakêta hukmî ya meclîsê derbaz bî erjna.

 

Mehtap Sert dîyar kerd ke herêma Çukurovayî de bi pêroyî 46 tepişteyê nêweşî est ê û va: “11 nînan ra giran ê. Dimayî 2016ine zîndanan ra agahî girewtiş zehmet o. Tepişteyî keyeyanê xo ra dûr manenê. 11 tepişteyê nêweşî est ê. Ma nê agahîyê ke yenê tespît kenê. Beno ke tepişteyê hîn nêweşî zî bibê la semedo ke ma nêeşkenê xo biresnê nê zîndanan, nê nînê tespîtkerdiş.”

 

Cigêrayîşê fekî û dermankerdişê bi kelepçe bi destê cendermeyan yeno kerdiş

 

Mehtap Sert wina va: “Tepişteyê nêweşî vernê de benê revîran. Doktorê uca biwazê, şirawenê nêweşxane. Nêweşxane de cigêrayîşê fekî û û dermankerdişê bi kelepçe ferz kenê. Dermankerdişê bi kelepçe reyan hetê cendermeyan, reyan hetê doktoran ra yeno waştiş. Heqê nêweşan verê çiman de nîno girewtiş.”

 

‘Raporî goreyê nêweşan nînê dayîş’

 

Mehtap Sert dîyar kerd ke zîndanê Tîpa R de tepişteyî dimayê demêk yenê dermankerdiş, semedê şertê dermankerdişê newe, rewşa tepişteyan verê çiman de nîno girewtiş û wina va: “Tepişteyî semedo ke tena yena verdayîş, nêeşkenê xo bipawê. Raporî yenê amadekerdiş û vanê, ‘eşkenê bişirawê zîndanê bînî’ yan zî ‘dermankerdişî red kenê’. Pêwa ke waştişêk wina yê tepişteyan çin o, raporê wina amade kenê. Nimûneyo tewr balkêş zî Aysel Tugluk bî. Rewşa aye werte de bî. La ATK’yî eksê ci rapor dayîne. Derheqê binpaykerdiş û tepişteyanê nêweşan de ganî dozgerî qerar bido.”

 

‘Tahliyekerdişê tepişteyan nîşaneyê samimiyetî yo’

 

Mehtap Sert tewr peyîn wina va: “Pakêta hukmî ke ameya vetiş, goreyê sozê ke ameyê dayîş nêameya amadekerdiş. Pêro xebatê derheqê prosesê çareserî de ganî aktorî samîmî têbigêrê. Proses yew hetî nêbeno. Ganî aktorê prosesî berpirsyariya xo bica bîyarê. Tahliyekerdişê tepişteyanê nêweşan semedê ma nîşaneyê samimîyetî yo. Zîndanan de hezar û 412 tepişteyê nêweşî est ê. Nînan ra 312 zî giran ê. Ganî nê tepişteyî nêweşnayanê pîlan de bêrê dermankerdiş. Bi qerarê heyetê werdê diyetî danê tepişteyanê nêweşan ê diyabetî. No proses qetî bêro vurnayîş.”