AMED - Endama heyetê îdarekarî ya Komeleya Cinîyan a Rosa Esra Çîçek Mercan derheqê rojeva prosesî peyîn de qisey kerd û va: “Ma do pêro sazgehê cinîyan dir bêrê têhet. Hemverê Serra Keyeyî yê dayê verê ma, polîtîkayê ke derheqê welidnayîşê cinî de qerar danê de ma do qerarê çalakîyan bigîrê.”

 

Tirkîya û Kurdistan de şîdetê cinîyan ser her ke şino zêde beno û qanûnî bêtesîr manenê. Komeleya Cinîyan a Rosa ya 2018ine heta nika hemverê şîdetê cinîyan ser o têkoşîn kena, rojev û xebatê xo ajansê ma rê pare kerd.

 

Endama Heyetê Îdarekarî ya Komeleya Cinîyan a Rosa Esra Çîçek Mercan derheqê rojeva komeleye de ercnayîş kerd.

 

‘Pirsgirêk pêknehatina qanûnan e’

 

Esra Çîçek Mercan wina qal kerd: “Netîceya têkoşînî de Peymana Stenbolî ame hazirkerdiş. Qanûnê 6284ine kewt merîyet. Semedê hîn madeyê Qanûnê Cezaya Tirkan û Qanûnê Medenî ya Tirkan de bêro vurnayîş, têkoşîn ame dayîş. Hem têgêrayîşê cinîyanê tirkan, hem têgêrayîşê cinîyê kurdî nê têkoşînî de bî. Badê nê têkoşînî qanûnan de vurnayîş ame kerdiş. La ma sibayêk wuştî Peymana Stenbolî amî antiş. Hukmê serdest ê camêrdan xeylêk qanûn çin hesibnayî. Bi bahaneyê rewşa başî, tahrîkê bêheq qanûnî pê nînê. Problem o yo ke  qanûn bi tesîr pê nînê. Semedo qanûnê bîyaye pê bêrê, têkoşîn kenê.”

 

‘Cinî eşkena derheqê xo de qerar bido’

 

Esra Çîçek Mercan îlankerdişê ‘serra keyeyî’ zî îlan kerd û va: “Keye, rolêk ke dewleta camêrdî cinîyan ser o ferz kerdo. Keye mekanîzmayêk ke cinîyan ser o qerarê sey hepsê keyeyî keno, çend tutan anê dinya, senî zewicêna û senî ciwîyena yo. Senî eşkenê cinîyan ser o qerar bidê. Nêweşxaneyê dewlete de cinî nêeşkenê kurtaj bibê. Nika rojeve de welidnayîşê sezeryanî est o. Nika prosesêk ke cinîyan ver bi welidnayîşê vajînalî wazenê berê. Sey têgêrayîşê cinîyê kurdî û pêro cinîyê Tirkîya ma do hemverê nê qerarê cinîyan ser o têkoşîn bikerê.”

 

Esra Çîçek Mercan wina peynî ard: “Prosesê qeyûman ê 8 serran texrîbatêk pîl cinîyan ser o viraşt. Ma cinîyan dir têkoşîn kenê. Ma atolyeyan de yenê têhet û hişmendî awan kenê. Komeleya Rosa lazimî ser o vejîya werte. Ma do hemverê polîtîkayê cinîyan ser o, qerarê çalakîyan bigîrê.”