STENBOL - Kortejê 1ê Gulane yê Kadikoyî de Hemsereka DEM Partî ya Pêroyî Tulay Hatimogullari qisey kerd û va ke piştgirîya ke seba çareserkerdişê meseleyê kurdî bêra dayene, eynî wextî de do tesîrê heqdestê ma û werdê ma zî bikera.

 

Hemsereka DEM Partî ya Pêroyî Tulay Hatimogullari kortejê 1ê Gulane yê Kadikoyî de qisey kerd.

 

Tulay Hatimogullari vat ke Tirkîya de krîzêko xorîn ê ekonomî yeno cîwîyayene û wina va: “Demê AKP’yî de 35 hezar merdimî cînayetê karî de cuya xo vîndî kerde. Ganî cînayetê karî biqedîyê. Eke ma bieşkê komelo demokratîk awan bikê, do verê têkoşînê kede zî abo. Ganî seba çareserîya mesleleyê kurdî gamê şênberî bêrê eştiş. Piştgirîya ke seba çareserkerdişê meseleyê kurdî bêra dayene, eynî wextî de do tesîrê heqdestê ma û werdê ma zî bikera. Ganî seba bi hêzkerdişê zemînî huqûqî, meclîs de xebatê sîyasî berê kerdiş. Wa Birêz Ocalanî ser o tecrîd wedarîyo, şert û mercê azadî ci rê bêrê awankerdiş.”

 

‘Ganî gamî bêrê eştiş'

 

Dewam de Tulay Hatîmogûllari dîyar kerd ke hewce est o ke gamî bêrê eştiş û va: “Ganî qanûnan û huqûqî de sererastkerdişê lazimî bêrê kerdiş. Ganî zemînê sîyasî, parlamento û huqûqî de bêro xurtkerdiş. Semedo ke no proses bieşko dewam bikero, ganî tecrîdê birêz Ocalanî ser o qetî bêro wedaritiş. Ganî bieşko her kesî dir pêvînayîş bikero. Ganî mercê xebate yê azadî bêrê awankerdiş. Ganî gamî bêrê eştiş.”