Tirkmenê elewî yê Rihayî: Ganî dewlete gaman bierzo 2026-11-19 09:20:10   Gulîstan Gulmuş   RIHA - Tirkmenê elewî yê Rihayî dîyar kerdî ke ganî dewlete semedê aşitîye gamê lazimî bierzo û wina vatî: “Ma bi prosesê aşitîye bawer kenê. Dem ganî nêro taloqkerdiş. Ganî lezkî aşitî bica bêro.” Taxa Kisasî ya qezaya Xelîliye ya Rihayî de bi serran o bawerî û şarê cîya ra merdimî têhet ciwîyenê. Tirkî, kurdî, erebî pîya ciwîyenê. Kisas de têkilîyê cîranîye estbîyayîşê kultur û pratîkê cuya hempar pawenê.   Tirkmenê elewî yê ke na dewe de ciwîyenê derheqê prosesê Aşitî û Cimatê Demokratîk de qisey kerdî.   ‘Ma ereb, kurd û tirk têhet de ciwîyenê’   Adîle Ak da zanayene ke ê bi serran o Kisas de pîya ciwîyenê û wina vat: “Yê ke ma serê payan de verdeno parekerdiş o. Wexto ke ez beroşêk werdî virazî şawena her kesî rê. Ma bi dewlemendî û peran rê eleqedar nêbenê. Semedê ma yê muhîm no nîyo. Yê muhîm dewlemendîya zerrî ya. Ma bi prosesî bawer kenê. Ma sey şarî yewbînan ra hes kenê, yewbînan pawenê. Ma heqanê merdiman esas gênê. Ma qîmet danê yewbînan. Prosesê Aşitî û Cimatê Demokratîk muhîm o. Ganî dewlete gamanê lazimî bierzo. Lezkî zî aştî bica bîyaro.”   ‘Tîya de bêtêduştî çin a’   Huriye Demîrcanli zî da zanayene ke bi serran o merdimê ke bawerî û nasnameyê cîyayî tîya de ciwîyenê û wina ard ziwan: “Ez tîya de ameya dinya. Ez cuya kulturê Kisasî ra hes kena. Tîya de yewbîyayîş est o. Tîya de parekerdiş est o. Yewbîyayîşê bawerîya elewî esas o. Tîya de kurdî, erebî û elewî, tirk est ê. Ma pîya bêyî bêtêduştîye tîya de ciwîyenê. Seba krîzê ekonomî tutê ma sey çawîşê pîspor şinê şer. Ma bi prosesê aştîye bawer kenê. Eke aştî bêro do şer zî çin bo. Ma wazenê ke dewlete lezkî game bierzo.”