Tepişteyê Apoyî: Wa tepişteyê nêweşî bêrê tehlîyekerdiş 2026-11-18 14:15:03   MERKEZÊ XEBERAN- Hepsîyanê Apoyîyan bi mesajêk piştîdayîşê xo yê çalakîya roniştişî ya bêwext a ke Anqara de seba hepsîyanê nêweşan ameya destpêkerdene eşkera kerd û waşt ke sere de hepsîyê nêweşî heme hepsî cade bêrê verdayene.   Bi nameyê hepsîyanê Apoyîyan Denîz Kayayî derheqê çalakîya roniştişî ya bêwext de ke roja sêşemeyî 17ê teşrîna peyêne de Anqara de ameye destpêkerdene eşkerayî daye.   Hepsîyanê Apoyîyan bale ante ser o ke hepsîyê nêweşî îmtîhananê bingeyinan ê Prosesê Aştîye û Komelê Demokratîkî ra yew ê.   Eşkerayîye de wina ame vatene:   “Sere de hepsîyê nêweşî heme hepsî bê ‘la’ û bê ‘feqet’ cade bêrê verdayene. Ma hepsîyê apoyî ke bi serran o sebebê nasnameyê xo yê sîyasî û girêdayîşê xo yê têkoşînê azadîye yê şarê xo ra zîndanan de yenê tepîştene, ewro reyna wazenê bale biancê peymanê haştî û çareserîya demokratîke yê tewr bingeyinan ra yewî ser o. Welatêk de ke behsê haştî beno, embazê ma yê zîndanan nêweşî, nêresayîşê tedawî û binpaykerdişanê heqê cuye reyde tena yenê verdayene. No mojneno ke îdîaya çareserîya demokratîke hema nêbîya raştîya şênbere ya cuye. Çunke haştî tena bi vatişanê sîyasîyan ney, bi binê emnîyetî girewtişê heqê cuye, temînkerdişê şertanê layiqê rûmetê merdimî û hewanayîşê astenganê vernîya azadîyan mana gêna. Nê hetî ra heqê cuye, resayîşê tedawî û azadîya hepsîyanê nêweşan berpirsîyarîyanê Prosesê Haştî û Komelê Demokratîkî yê ke nêyenê taloqkerdene û îmtîhananê ci yê tewr bingeyinan ra yew a.   Bi na berpirsîyarîye ma kesanê ke Ankara de seba heqê cuye û azadîya hepsîyanê nêweşan çalakîya roniştişî ya bêwext kenê û kesanê ke wayîrê na çalakîye vejîyenê silam kenê. Ma bale ancenê ser o ke têkoşînê cuye yê hepsîyanê nêweşan tena berpirsîyarîya keye û nêzdîyanê înan ney, berpirsîyarîya hempare ya heme waranê komelî ya ke hetê haştî, demokrasî û cuya azade de yê. Ma bawer kenê ke ganî no têkoşîn bi îradeyê hempar û piştîpêdayîşê şaranê ma bêro girdkerdene.   Demêk de ke proses aver şino, dewamkerdişê binpaykerdişanê heqan, pratîkanê tecrîdî û şertanê ke cuya hepsîyanê nêweşan tehdîd kenê ruhê prosesî û îdîaya çareserîya demokratîke reyde pê nêgêno. Perspektîfê bedilîyayîşî yo stratejîk o ke Rayberîya ma ronayo mecbur o tena vatişê sîyasî de ney, heme waranê cuya komelkî de cewabêko şênber bivîno. Rayîrê naye o yo ke dewlete û îqtîdar nêzdîbîyayîşanê ke prosesî wext ra vila kenê û pawênenê ra fek verdê û hetê demokratîkbîyayîşî de gamanê şênber, qerardar û bawerîdayoxan bierzê.   La çîyê ke ewro zîndanan de ciwîyenê mojnenê ke na babete de hema problemêko cidî yê îrade û tatbîqî est o. Bi seyan hepsîyê nêweşî problemanê giranan ê weşîye û nêweşîyanê ke cuye tehdîd kenê reyde zî hepisxaneyan de yenê tepîştene; resayîşê înan ê tedawî bi sebebanê cîyayan yeno astengkerdene, heqê înan ê verdayîşî bi nêzdîbîyayîşanê keyfî û sîyasîyan yeno hewanayene. Embazê ma Tuncer Saglam bê ke bireso heqê tedawî cuya xo ra bî û naye mojna ke na polîtîka netîceyanê çend giranan ana. Embaza ma ya nêweşa losemî Newroze Bozkurt ewnîyayîşê xorînî de têkoşînê cuye dana û embaza ma Evîne Zapsu rê teşxîsê kanserê merheleya çarine ame ronayene; nê zî mojnenê ke rewşa hepsîyanê nêweşan êdî nêyena taloqkerdene.   Cuya merdimî û heqê weşîye nêbenê babeta tu sebebê sîyasî, îdarî yan zî emnîyetî. Resayîşê tedawî û azadîya hepsîyanê nêweşan îmtîyaz nîyo, heqo tewr bingeyin o merdimî û huqûqî yo. Eynî şekil de embazê ma yê ke înfazê înan temam bîyo la azadîya înan bi sebebanê cîyayan yena astengkerdene hema zîndan de yenê tepîştene û no zî nêyeno qebulkerdene. Heta ke tecrîd, ferzkerdişê poşmanîye û polîtîkayê şikitişê îradeyî yê zîndanan nêqedîyê behsê averşîyayîşêkê raştikênî yê hetê demokratîkbîyayîş û haştîya komelkî nêbeno.   Ma sey hepsîyanê apoyîyan bi şûurê parekerdişê eynî berpirsîyarîya tarîxî û qîymetanê têkoşînî yê heme embazanê xo reyde ke zîndanan de têkoşînê heqê cuye û azadîye kenê, do têkoşînê azadî û cuya birûmete dormeyê îradeyêkê hemparî de dewam bikerê.   Nê bingeyî ser o ma çalakîya roniştişî ya bêwext a ke verê Wezaretê Edaletî yê Ankara de ameya destpêkerdene sey îfadeyê berpirsîyarîyêka meşrû û tarîxî vînenê ke heqê cuye yê hepsîyanê nêweşan û azadîya heme hepsîyan pawena. Ma bawer kenê ke wayîrvejîyayîşo komelkî yo ke do dormeyê çalakîye de aver şêro, do qewet bido xoverdayîşê embazanê ma yê zîndanan, vengê keyeyan hîna xurt bido eşnawitene û waştişê azadîye bikero îradeyêko komelkî yo hempar.   Tîya ra vengdayîşê ma yê şarê ma û raya pêroyî ya demokratîke rê no yo: Ma wayîrê heqê cuye yê hepsîyanê nêweşan bivejîyê. Ma çalakîya ke Ankara de ameya destpêkerdene tena nêverdê; sey cinî, ciwan, kedkar, dezgehê demokratîkî û pawitoxê heqanê merdiman dormeyê na çalakîye de bibê yew. Ma yewîya xo ya têkoşînî ya embazanê xo yê ke zîndanan de xover danê reyde gird bikerê. Çunke çîyê ke zîndanan de ciwîyenê tena problemê hepsî û keyeyanê înan nîyê; berpirsîyarîya hempare ya herkesî ya ke edalet, azadî û komelo demokratîk wazeno. Bê ke ma vinderê embazêkê ma cuya xo ra bibo, ganî ma seba azadî û heqê tedawî yê hepsîyanê nêweşan îradeyêko komelkî yo xurt bimojnê.   Vengdayîşê ma yê dewlete û îqtîdarî rê zî eşkera yo: Berpirsîyarîyanê ke Prosesê Haştî û Komelo Demokratîk wazeno hîna taloq mekerê. Nêzdîbîyayîşanê ke prosesî sewîyeya vatişî de tepîşenê û gamanê şênberan wext ra vila kenê ra fek verdê. Astenganê vernîya azadîya heme hepsîyan, sere de hepsîyê nêweşê giranî, bê ‘la’, bê ‘feqet’ û cade hewa nê. Hepsîyanê nêweşan bêşert verdê û heqê înan ê tedawî bigîrê binê emnîyetî; hepsîyanê ke înfazê înan temam bîyo verdê û peynî bidê pratîkanê bêhuqûqan ê zîndanan. Komelkîbîyayîşê haştî û averşîyayîşê çareserîya demokratîke tena bi gamanê şênberan ê nê hetî mumkin o.   Ma sey hepsîyanê apoyîyan bi şûurê parekerdişê eynî berpirsîyarîya tarîxî û qîymetanê têkoşînî yê heme embazanê xo reyde ke zîndanan de têkoşînê heqê cuye û azadîye kenê, do têkoşînê azadî û cuya birûmete dormeyê îradeyêkê hemparî de dewam bikerê. Nê bingeyî ser o ma bawer kenê ke şarê ma do bi xurtî wayîrê çalakîya Ankara bivejîyo, dormeyê na çalakîye de bibo yew, wayîrê xoverdayîşê zîndanan bivejîyo û waştişê azadîye bikero têkoşînêko komelkî yo hîna xurt.   Ma qerardarîya xo ya caardişê berpirsîyarîyanê xo yê seba awankerdişê haştî, demokrasî û cuya azade newe kenê û eşkera vanê ke ma do vera binpaykerdişanê heqê cuye û azadîya embazanê xo bêveng nêmanê.”