Çalakîya cinîyan ê nobede: Kiştişê cinîyan polîtîk o 2026-11-17 14:56:13   AMED - Torra Vera Şîdetî ya Amedî hewteyê 7. de vernîya Edlîyeya Amedî de bale ante qetlê cinîyan û sucanê nefretî yê vera transan ser o. Çalakî de wina ame vatene: “Vîr tena vîrardiş nîyo, eynî wextî de vera şîdetî pawitişê heqê cuye yo.”   Nobeta Cinî, Edalet û Vîrî ya ke Torra Vera Şîdetî ya Amedî dest pêkerd, hewteyê 7. de vernîya awanîya Edlîyeya Amedî de dewam kerd. Endamê Komeleya Cinîyan a Rosa, TJA, BES, ÎHD, OHD û zaf sazgehanê komelkî beşdarê nobete bîyî. Nobete de pankartê “Cinî nobeta edalet û vîrî gênê” ame akerdene û resmê cinîyanê ke ameyê kiştene, ameyî berzkerdene.   Eşkerayîya nê hewteyî hetê endama Komeleya Cinîyan a Rosa Nermîn Ûnate ra ameye wendene. Nermîn Ûnate vat: “Ma ewro cografyayêk de yê ke tede cinî hetê camêrdan ra yenê kiştene û merdişê înan sey ‘xokiştiş’, ‘qeza’ yan zî ‘merdişo şikdar’ tarîtî de yenê verdayene. Ma tîya de yê ke xovîrkerdiş û bêvengîye red bikerê. Nê kiştişî serebûdê şexsî nîyê; netîceyê zîhnîyetê pederşahî, bêcezayîye û sîstemê serdestîya camêrdan ê. Nameyê hedefgirewtişê sîstematîk ê cuya cinîyan qirkerdişê cinîyan o.”   Hewteyê 7. yê nobete de bi munasebetê 20ê Teşrîna Peyêne, Roja Vîrardişê Transanê Mexdûrê Sucanê Nefretî, qetlê Sudenaza ke Amed de ameye kiştene û têkoşînê edaletî yê seba aye ame kerdene. Peynîya eşkerayî de hîkayeyê 7 cinîyanê ke mabênê 9 û 15ê teşrîna peyêne de şaristananê cîyayan de ganê xo ra bîyî, ameyî wendene.   ‘Bi rêxistinbîyayîşî ma eşkenê şîdet û qetlê cinîyan vindarnê’   Eşkerayî ra pey Hemşaredara Şaredarîya Amedî ya Şaristanê Girdî Serra Bucake ard ziwan ke amancê nê xebatan o yo ke vernîya qetlê cinîyanê bînan bêro girewtene û wina vat: “Cinîyanê ke ma tayêk ver nameyê înan hûmaritê û cuye ra ameyî birnayene, cografyaya înan yewe zî çin a. Tena nasnameyêkê înan est o; o zî cinîbîyayîş o. Ganî no têkoşîn Amed ra heta Çanakkale, Afyon û Îzmîrî sey têkoşînê cinîyan bibo yew, bêro têhet û têkoşînêko rêxistinkerde bîyaro meydan ke ma pîya şîdetê serê cinîyan û kiştişê cinîyan vindarnê.”   Qiseykerdişê Serra Bucake ra pey çalakî bi sloganan û çepikan qedîyaye.