Tulay Hatimogullari: COP31 vera xoza de zîrveyê talanî yo 2026-11-14 15:12:29   ANTALYA - Hemsereka Pêroyî ya DEM Partî Tulay Hatîmogullari Antalya de reaksîyonê xo talanê ekolojîk ê bin banê COP31’î de rê mojna. Tulay Hatîmogullari dîyar kerd ke sermayedarî COP31 seba dewamkerdişê sîstemê xo yê talanî kenê perde û wina vat: “Nê rojanê ke çekî bêveng bîyê de, sermaye hîna lez keweno şaristananê kurdan û tebîetî talan keno.”   Hemsereka Pêroyî ya DEM Partî Tulay Hatîmogullari verê Kombîyayîşê Îklîmî yê Şaran, otelêkê qezaya Konyaalti ya Antalya de bi sloganê “Vera vîtrînê COP31’î ma cuye pawenê” konferansêko çapemenî da.   Tulay Hatîmogullari dîyar kerd ke îqtîdar COP31 seba talanê tebîetî keno perde û bale ante prosesê nikayênî ser û wina vat: “Ewro nê rojanê ke ma qalê Prosesê Aştî û Komelê Demokratîkî kenê û çekî bêveng bîyê de, ma vînenê ke kapîtalîzm û sermaye bi lezêko pîl kewenê şaristananê kurdan.”   COP31 seba dewamkerdişê sîstemê talanî kenê perde’   Tulay Hatîmogullari dîyar kerd ke çend rojî verê cû qezaya Alîaga ya Îzmîrî de fabrîkaya asin û polayî ya HABAŞ’î de netîceyê qetlîamêkê karî de 19 karkeran cuya xo vîndî kerda. Tulay Hatîmogullari no çî bi hêrsê qezencî yê şirketanê ke tewrê COP31’î benê, eşkera kerd û nê çîyî ardî ziwan: “No qetlîamê karî sebebê îhmalê patronan ra bî ke weşî û emnîyetê karkeran îhmal kenê û karkeran rê sey parçeyêkê asinî ewnîyenê. Karkerê ke wazenê nê qetlîamê karî protesto bikerê zî, hetê patronan ra bi destê cendirmeyan kuyayîş wenê. Ma tu rey no çî qebul nêkenê.”   Tulay Hatîmogullari bale ante tewrbîyayîşê dewlete û şirketan ê COP31’î ser û wina dewam kerd: “Vanê ke ê cigêrayîşê ‘ma do senî dinya bixelesnê’ de yê. La pêro, seba dewamkerdişê sîstemêkê ke dinya ver bi tarîtîye beno û cuya heme ganîyan hedef gêno, COP31 kenê perdeyêk. Sîstemê sermaye û kapîtalîzmo wehşî kewto derdê zêdekerdişê qezencê xo û talanê tebîetî her ke şono hîna kûr keno. Ez heme têkoşeranê ke vanê ‘tebîet, awe û hewa seba rotişî nîyê’ û vera COP31’î têkoşînêko alternatîf ramenê, bi hurmet silam kena.”   ‘Tirkîya kerda merkezê çopî yê Ewropa’   Tulay Hatîmogullari dîyar kerd ke îqtîdarî COP31’ê Antalya kerdo panoyêka reklamî û wina dewam kerd: “Nê îqtîdarî Tirkîya kerda merkezê çopî yê Ewropa û hêzê karî yo erzan ê sermaye. Tirkîya de şima ver bi kamcîn hetî şêrê, şima rastê warêkê sucê ekolojîkî yenê. Xerîtayanê madenan ê ke ameyê weşanayîş de şima nêeşkenê yew noqtaya venge zî bivînê.”   ‘Nika şaristanê kurdan kerdê hedef’   Tulay Hatîmogullari bale ante hêrişanê ekolojîkan ê şaristananê kurdan ser û na îqaz da: “Ewro nê rojanê ke ma Tirkîya de qalê Prosesê Aştî û Komelê Demokratîkî kenê, nê rojanê ke çekî bêveng bîyê de, ma vînenê ke kapîtalîzm û sermaye bi lezêko pîl kewenê şaristananê kurdan. Ma vînenê ke şaristananê kurdan de tebîet senî yeno talankerdiş. Seba ke çîyê ke Ege, Deryaya Sîyaye û Deryaya Sipîye de kerdê, zêde bikerê, nika şaristanê kurdan kerdê hedef.”   ‘Îklîmî ney, sîstemî bivurnê’   Tulay Hatîmogullari dîyar kerd ke herre, dar û zozanî seba şarî mal nîyê, raste-rast parçeyêkê cuye yê û sîstemê kapîtalîst wazeno merdiman dorûverê înan ra bibirno. Tulay Hatîmogullari xoverdayîşanê ekolojîkan ê mintiqayanê cîyayan ard vîrî û qiseyê xo wina qedêna: “Hema hewteyanê vîyartan de Ahmet Kervanpinar de, Zozanê Perşembeyî yê Ordu de, dewanê Gimgimî (Varto) yê Mûşî de, Gumuşxane, Uşak û Artvîn de, her ca de têkoşînê cuye est o. Îtîrazê Giyadînê (Dîyadîn) Agirî zî parçeyêko zaf bihêz ê nê têkoşînî yê. Eke îqtîdarî nê welatî û herrê ey ra hes bikerdêne, qanûnê bi hûmara 7554, yanî qanûnê talanî, nêvetêne. Ma vera nê qanûnî muxalefetêko bihêz kerd û ma veng da ke ‘îklîmî ney, sîstemî bivurnê’.”