Dayîkê Şemeyî çalakîya xo ya 1129. organîze kerd 

2026-11-14 14:56:20


	 

	STENBOL - Dayîkê Şemeyî hewteya 1129. ya çalakîya xo de aqubetê Bekîr Demîrî persa ke 13ê teşrîna verêne ya serra 1993î de ameybi vîndîkerdiş û vat: “33 serrî yo ma raştîye dima yê.”

	 

	Dayîk/Merdimê Şemeyî bi waştişê “Wa vîndîbîyayî bêrê dîyiş, kiştoxî bêrê muhakemekerdiş” sey her hewte no hewte zî, hewteya 1129. de Meydanê Galatasarayî yê Îstanbulî de çalakîya xo ya hewtane viraşte. Dayîkê Şemeyî, endam û îdarekarê ÎHD’yî yê Îstanbulî û zaf pawitoxê heqanê merdiman tewrê çalakîye bîyî. Çalakîye de fotografê vîndîbîyayeyan ameyî girewtiş. Çalakîya nê hewteyî de aqubetê Bekîr Demîrî ame persayîş ke 13ê teşrîna verêne ya serra 1993î de ameybi vîndîkerdiş.

	 

	Eşkerayîya nê hewte endama ÎHD’yî ya Îstanbulî Zeynep Yildize wende.

	 

	‘Ey kerd erebe û berd’

	 

	Zeynep Yildize ard ziwan ke ê hewteya 1129. de seba raştîye tîya yê û wina vat: “Bekîr Demîr 29 serre û pîyê 4 domanan bî. Êlih ra bî û Edene de ciwîyêne. Otogar de sey ramitoxê taksî xebitîyêne. Embazanê ey ê karî Bekîr Demîr dawetê keyeyê xo yê dewa Alacakepîre ya qezaya Pasûrî ya Amedî kerd. Bekîr Demîr bi cinî û yew domanê xo reyde şî dewe. Ê wextî Tugayê Bolu yo ke bin qumandarîya Yavûz Erturkî de bî, mintiqa de operasyonî kerdêne. 13ê teşrîna verêne ya serra 1993î de 30 kesî meydanê dewe de ameyî arêdayîş. Bekîr Demîr, seba ke dewij nêbî, bi fermanê qumandarîya eskerî kerd erebe û berd. Cinîya ey û dewijî bîyî şahidê hadiseyî. La badê a roje Bekîr Demîrî ra tu agahî nêame girewtiş. Keyeyî muracatê qumandarîya eskerî û cendirmeyan kerd la tu cewab nêame dayîş. Serranê 1995 û 2002î de keyeyî Serdozgerîya Komare rê dilekçe şawite. Serdozgerîye cewabê ‘ê wextî uca tu operasyon nêbîyo’ da. Rixmê ke hende şahidê hadiseyî bîyî zî, no cewab ame dayîş. Daneyanê Qumandarîya Komando ya 2. ya Bolu de vejîya meydan ke operasyon bîyo.”

	 

	Ma pey raştîye dima yê’

	 

	Zeynep Yildize dîyar kerd ke goreyê îfadeyanê şahidan, Serdozgerîya Komare ya Pasûrî 3ê teşrîna peyêne ya 2014î de sebebê ravîyartişê demî ra qerarê muhakemenêkerdişî da û wina qisey kerd: “Îtîrazê keyeyî zî 5ê adare ya serra 2015î de ame redkerdiş. Dozgerîya Eskerî 6ê teşrîna peyêne ya serra 2011î de arşîvê Qumandarîya Komando ya 2. ya Bolu waşt, la qumandarîye bi maneyê ke bînaya arşîvî bin awe de menda, arşîv nêda. Bi no hawa nêvejîya meydan ke kamcîn qumandarî tewrê operasyonî bîyê. Keyeyî dawa berde Mehkemeya Destûrî la mehkemeyî 7ê sibate ya serra 2015î de sebebê qerarê ravîyartişê demî ra muracat qebul nêkerd. 33 serrî yo ma raştîye dima yê.”

	 

	Çalakî meydan de bi ronayîşê karanfîlan qedîye.