Koçerî qedîya la têkilîyê aye herre dir nêqedîya

2026-11-11 10:59:07


	 

	MÊRDÎN - Şemsê Abeş a ke qezaya Artukluyî ya dewa Qereşîkî ya Mêrdinî de ciwîyena, bi serran koçerîye kerd. Şemsê Abeş dimayê ke derbazê cuya dewe bena zî têkilîya xo ya bi herre û xoza ra nêbirnena.

	 

	Şemsê Abeş a 68 serrî ya ke dewa Qeraşîkî yê qezaya Artukluyî ya Mêrdînî de ciwîyena, bi serran koçerîye kerda û rayîrê koçberî, ko û zozanan de cuya aye vîyarta. Şemsê Abeş dimayê ke derbazê cuya dewe bena zî têkilîya xo ya bi herre û xoza zî nêbirnena.

	 

	Baxçeyê xo gane kena. Baxçeyê vernîya keyeyê xo de sebze û fêkîyê cîyayî çînena û no tena çimeyê debarî, hîkayeya berardiş û cuyêka ke tu wext peynî nêbena ya.

	 

	Şemsê Abeş a ke qalê cuya dewe û keda cinîye kerd, dîyar kerd ke eke keda cinîye çinbo cuya dewe nêşena bidomîyo.

	 

	Şemsê Abeş derheqê cuya dewe de ajansê ma rê qisey kerd.

	 

	'Ma 40 serrî verê dest koçerîye ra verda'

	 

	Şemsê Abeş va ke no 50 serrî ra zêdeyêr o ke dewa Qereşîkî de ciwîyena û wina va: "Ma dewe de baxçeyê xo de xebate kenê. No baxçe heta çend serrî verê çinbî. Verê ma tîya de problemê awe ciwîyayêne. Ceyran çinbî, awe çinbî. Semedê çinbîyayîşê awe problemî yenê ciwîyayîş. O wext pesê ma estbî. Ma semedê awe pesê xo berdêne Bismil, Êlih. O wext ma koçerîye kerdêne. Ma şit ra her tewirî werd viraştêne. Ma nêzdîyê 40 serrî verê dest koçerîye ra verada. Bi ameyîşê awe û ceyranî ma dewe xo de mendî."

	 

	'Herre dir eleqedar beno'

	 

	Şemsê Abeş va ke verê cuya dewe zehmet bîya û wina va: "Keyeyê ma sey yê nika nêbî. O wext her xebate bi keda cinîye ameyîne kerdiş. Zilmêk pîl ser cinîyan estbî. Nika rehetî ya. Tutê ma pîl bîyî. La ez nika zî nêvinderena. Her çî kena. Herre dir eleqedar bena."

	 

	

	 

	'Hem ewnîyena heywanan ra hem ewnîyena baxçe ra'

	 

	Şemsê Abeş wina qedêna: "Ma nika heywananê xo rê, baxçeyê xo rê ewnîyenê. Kergê mi est ê, pesê mi, mangayê mi est ê. Ma goştê înan, şitê înan ra debara xo kenê. Baxçeyê ma de zî miro, mişmiş, sa, engure, încîre û zaf fêkîyê bînî est ê."