Semedê Rojîn Kabaîşe do têkoşîn dewam bikero

2026-11-09 10:24:13


	 

	ANQARA - Komîsyonê Semedê Rojîn Kabaîşe Edalet, semedê ke merdişê biguman ê Rojîn Kabaîşe roşin bibo aşma adare de kampanyaya îmzeyan dest pêkerd û 70 hezar û 501 îmza ke kom kerdî teslîmê Wezaretê Edaletî kerdî. Endama komîsyonî Elçîn Kurdoglu va ke ê wazenê têlefonê Rojîne bêro akerdiş, nimûneyê DNAyî ayîdê kamî yê bêrê eşkerakerdiş, yê ke îhmalkarîyê înan est ê bêrê muhakemekerdiş. Sewbîna va ke heta edalet pê nêro do têkoşînê înan bidomîyo.

	 

	Wendekara Zanîngehe Yuzuncu Yilî Rojîn Kabaîşe 27ê êlule 2024ine de vînî bî û cenazeya aye 15ê teşrîna peyêne de ameye vînayîş. Komîsyonê Semedê Rojîn Kabaîşe Edalet ke semedê merdişê biguman roşin bibo têkoşîn kenê, aşma adare de kampanyaya îmzeyan dest pêkerd û 70 hezar û 501 îmza kom kerd û teslîmê Yewîya Cipersayîşê Sucanê Kerdoxê Nêdîyarî kerd. Endama Komîsyonî Elçîn Kurdoglu derheqê mesele de qisey kerd.

	 

	'Rojîne întîxar nêkerd, heme delîlî nê nîşan danê'

	 

	Elçîn Kurdoglu va ke semedê ke merdişê biguman ê Rojîn Kabaîşe roşin bibo di serrî yo têkoşîn kenê û va: "Bi armancê ke waştişê ma biresê girseyanê hîrayan ma kampanyaya îmzeyan dest pêkerd. Heme delîlî nîşan danê ke Rojîne întîxar nêkerda. Ma nê rê vanê cînayet o. Waştişê ma est ê. Lazim o ke têlefonê Rojîne bêro akerdiş, dozgerêk pispor semedê dosyaye bêro tayînkerdiş, heme prosesî bi zelalî bêrê eşkerakerdiş, nameyê kamî vîyareno wa bêro muhakemekerdiş."

	 

	Îmza teslîmê wezaretî bîyî

	 

	Elçîn Kurdoglu va ke armancê înan no bî ke bi kampanya merdimî bikerê hemkarê waştişan û va ke îmzeyê ke kom kerdî teslîmê Yewîya Cipersayîşê Sucanê Kerdoxê Nêdîyarî yê Wezaretê Edaletî kerdî û wazenê ke waştişê înan bêrê caardiş. Elçîn Kurdoglu wina dewam kerd: "Ma wazenê ke merdişê bigumananê cinîyan roşin bibê. Serra 2025ine de hûmara merdişanê bigumananê cinîyan hûmara qetilkerdişan ra zêdeyêr bî. Ma wazenê ke nê merdişî roşin bibê. Polîtîkayê şerê taybet û sucê hemverê cinîyan zî beşêk têkoşînê ma yo. Ma bê ke nê polîtîkayê şerê taybetî nêdîyaye ra bêrê, têkoşînê xo domnenê. Ma semedê Rojîne zî têkoşîn kenê û heme cinîyanê bînan zî semedê înan têkoşîn kenê."

	 

	'Ma qeydê ke têlefon de yenê nimitiş zanê'

	 

	Elçîn Kurdoglu wina dewam kerd: "Têlefonê Rojîn Kabaîşe hetê cipersayîşî ra muhîm o. Têlefon pêwa şirawitişê Îspanya û Çînî hema nêame akerdiş. No di serrî yo têlefon nêyeno akerdiş. Ma zanê çi têlefon de yeno nimitiş. Wa nimûneyê DNAyî û delîlê bînî zî bêrê eşkerakerdiş. Zaf kesê ke lazim o bêrê cipersayîş est ê. Lazim o ke nê heme bêrê cipersayîş û muhakemekerdiş. Heme kesê ke îhmalkarîyê înan est ê wa bêrê muhakemekerdiş."

	 

	'Ma heme cinîyan 25ê teşrîna peyêne de dawetê kuçeyan kenê'

	 

	Elçîn Kurdoglu dîyar kerd ke heta waştişê înan nêrê caardiş do têkoşînê xo bidomnê û va: "Hedefê ma yê verêne 25ê teşrîna peyêne yo. Ma do têkoşînê xo bi eynî hêz hîna xurtêr bidomnê. Hedefê ma no yo ke ma bi girseyêk xurt şêrê 25ê teşrîna peyêne. Ma 25ê teşrîna peyêne de heme cinîyan dawetê kuçeyan kenê.”