Hêrişî cinîyan ser o zêde benê: Çareserî komara demokratîk a 2026-07-11 09:07:04   STENBOL - Îdarekara Komeleya Demê Cinîyan Fatma Nur Çete hêrişê cinîyan ser o erjna û da zanayene ke awankerdişê komara demokratîke dir cinîyî zî do azad bibê.   Şîdetê cinîyan ser, qetilkerdiş û mergê bi gumanî yê cinîyan her ke şinê zêde benê û cinîyî hetê kesanê tewr nêzdîyanê xo ra yenê qetilkerdiş. Polîtîkayê îqtîdarî cinîyan fînenê plano peyêne, kerdişê bêcezaverdayîşî zî cesaret dano gumanbaran. Cinîyî dîyar kenê ke ganî polîtîkayê ke heqê ciwîyayîşî esas gênê, bikewê cuye.   Îdarekara Komeleya Demê Cinîyan ra Fatma Nur Çete da zanayene ke polîtîkayê ‘serra keyeyî’ yê îqtîdarî, cinîyan wareyê selahîyetî ra dûr fînayê û hepsê rolê ke zîhniyetê serdestî ferz kerdê, kenê. Fatma Nur Çete wina ard ziwan: “Şîdetê cinîyan ser her ke şino zêde beno. Ganî polîtîkayê ke cinîyan pawenê bikewê cuye. Ganî demokratîkbîyayîş pê bêro û têkoşînê rêxistinkerde yê cinîyan bêro pîlkerdiş.”   Cinîyî yenê qetilkerdiş   Fatma Nur Çete dîyar kerd ke dimayê îlankerdişê ‘Serra keyeyî’ ya 10 serranê peyênan de, qetilkerdişê cinîyan zêde bîyî û wina dewam kerd: “Bi nê polîtîkayan hedef kenê ke cinîyan zerreyê keyeyî de heps bikerê. Qetilkerdişê cinîyan zêde benê. Cinîyî hetê kesanê tewr nêzdîyanê xo ra, hetê pî, bira û mêrde ra yenê qetilkerdiş. Semedê nê zî serra keyeyî cinîyan nêpawena.”   ‘Bêcezaverdayîş cesaret dano gumanbaran’   Fatma Nur Çete dîyar kerd ke qetilkerdiş bi polîtîkayanê bêcezaverdayîşî yeno normalkerdiş û dewaya Fatma Nur û Hîfa yê ke Zeytînburnu de bi guman dinyaya xo bedelnayî ard vîr û va: “Yeno îdîakerdene ke întîxar kerdê. Labelê ma zanê ke mêrdeyo gumanbar ewilî desteştişî cinîye keno, aye dir zewijîyeno û dima ra zî desteştişê keyneya xo keno. Na cinîye verê çapemenî de vengê xo dabi eşnawitiş. No îxbarêko eşkere bi, muracatê sûcî bi. Labelê tu cipersayîşêk gumanbarî rê nêame akerdene.”   Komara demokratîke   Fatma Nur Çete wina dewam kerd qiseykerdişê xo: “Kurdistan de zî polîtîkayê şerê taybetî yenê rayraberdene. Çareserî bi awankerdişê komara demokratîke mimkûn a. Gulîstan Doku, Rojîn Kabaîş, Rojwelat Kizmaz, Îpek Er… Hema zaf cinîyê bînî. Na raştîya polîtîkayanê şerê taybetî ya. Polîtîkayê şerê taybetî cinîyan qetil kenê. Ma komareka verbayê demokratîke de ciwîyenê. Çareserî awankerdişê komarêka demokratîke ya. Wexto ke komarêka demokratîke bêra awankerdiş, cinîyî zî do azad bê. Ganî dewlete têkoşînê vera şîdetê cinîyan ser de mesulîyetê xo bîyara ca. Ganî lezkî polîtîkayê ke cinîyan pawenê bikerê cuye. Çareserî têkoşînêko rêxistinkerde yo. Ganî cinîyî paştdayîş û têkoşînê kolektîfî pîl bikerê.”