Adalet Kaya: Tecrîdê Abdullah Ocalanî ser o dewam keno 2026-07-04 10:14:02   Rozerîn Gultekîn   AMED - Parlamentera DEM Partî Adalet Kaya derheqê proses û tecrîdê de qisey kerd û va: “Birêz Ocalan bi sînor pêvînayîşan keno. No do netîceyêke senî weş bivejo werte? Ganî azadîya fîzîkî pê bêro. Cimat her game taqîb keno. Ganî her het berpirsiyarî bigîro xo ser.”   Prosesê Aşitî û Cimatê Demokratîkî yo ke hetê Rayberê Şarê Kurdî Abdullah Ocalanî ra ame destpêkerdene serrêk o dewam keno û hema dewlete gamêka somut nêeşta. Bi taybetî zî tecrîdê serê Rayberê Şarê Kurdî Abdullah Ocalanî dewam keno û no zî beno semedê qelsîyê prosesî. Parlamentera Partîya Têduştî û Demokrasî yê Şaran (DEM Partî) Adalet Kaya derheqê prosesî de qisey kerd.   ‘Ganî her het berpirsiyarî bigîro xo ser’   Adalet Kaya va ke şarî dir fikar û hêvî pîya yenê cuyayîş û wina va: “Pêwa ke Birêz Ocalanî û PKK’yî zafê gamî eştî zî hema hetê dewletê ra gamêka somut nêameya eştene. Labelê heto bîn ra şar hêvîya xo dewam keno. Her ca de ma na hêvîye vînenê. Ganî na hêvîye bêro pîlkerdiş. Hîsgêrîya ke est a ganî bêro mobîlîzekerdiş. Ganî her het îradeyê xo bimojno, xo îfade bikero û berpirsiyarî bigîro xo ser..”   ‘Wexto cimat teberê prosesî rê bêro girewtene do proses bixetimîyo’   Adalet Kaya ard ziwan ke seba awankerdişê aşitîye yewbîyayîş rayîrê çareserîye yo û wina dewam kerd: “Cuyêka têduştî û pîya, cuyêka şarî ra dûrî nîya. Polîtîkayê ke şaran yewbînan ra dûrî fînenê, kerdê mîyanê cuye. Ma eşkenê yewbîyayîş awan bikerê, cîyayîyan bîpawê û vera nê hêrişan vinderê. Ma wayîrê paradîgmayêk ê ke eşkenê vernîya nê bigîrê yê. Eke ma nê bikerê mîyanê cuye, do vernîya kaosî bêro girewtene. Prosesê Aşitî û Cimatê Demokratîkî do tesîrê zafanê cografyayan bikero. Ganî ma cimatî tewrê prosesî bikerê. Eke cimat teberê prosesî bêro girewtene do proses bixetimîyo.”   ‘Behrêsîya heta Akdenîz xebatî yenê rayraberdene’   Adalet Kaya dîyar kerde ke çarçewaya prosesî de xebatan rayra benê û va temamê hetanê cimatî dir yenê pêser, Behrêsîya heta Akdenîzî xebatanê xo rayra benê. Adalet Kaya sewbîna bale ant serê rolê cinîyan ê mîyanê prosesî de û dîyar kerd ke cinîyî seba aşitîyêka mayînde û bi rûmet kerdoxê prosesî yê û wina ci de şî: “Cinîyî ewro hem mîyanê têkoşînî de hem mîyanê awankerdişê aşitîye de hem zî mîyanê sîyaset û îdarekerdişê herêmî de kerdox ê. Nê semedî ra zî bîyayîşê cinîyan ê mîyanê prosesanê muzakere û aşitîye de do hîn weşêr bo û do proses pozîtîf aver bikewo.”   Tecrîd dewam keno   Adalet Kaya peynîya qiseykerdişê xo de polîtîkayanê tecrîdî ser o zî vinda û va hetêk ra aşitî hetêk ra polîtîkaya tecrîdî dewam kena û wina va: “Ganî azadîya fîzîkî û statu seba Birêz Ocalanî bêro naskerdene. Ganî gama qanûnî ya ke statu û azadîya fîzîkî pê yena bêro eştene. Pêvînayîşê Birêz Ocalanî dir bi sînor pê yenê. Nê temamê binê kontrolê dewletê de pê yenê. Wexto ke bi qanûn tecrîd rawuşt ma eşkenê vajê ke temam o. Labelê hema tecrîdê serê muxatabê prosesî dewam keno. Hewcedarî bi qanûnê kok o ke Birêz Ocalanî zî îfade kerdo est o. Verê ke meclîs bikewo betlane ma hewl danê ke qanûnê kokî bêro derbaskerdene.”