
Xoverdayîş û keda cinî kilîman de nimite yo 

2026-06-24 10:09:01


	&nbsp;

	WAN - Nesîbe Ertaş a ke tutîya xo ra heta nika kilîman viraznena û no kultur gane kena, dîyar kena ke kilîmî tena hunerê destan nîyê, hîkayeyê cuye, hêvî û hîsê cinîyan hewênenê û venga wayîrvecîyayîşê nê kultur û mîrasî kerd.

	&nbsp;

	Kilîmê ke yew nîşaneyê tewr xurtî yê têkilîyê cinîye ya bi kede, vîr û cuye îfade kenê, nesl bi nesl heta ewro sey mîrasê kulturî bîyayîşê xo pawenê. Her neqşê aye hîkaye, his, xoverdayîş û keda cinîye hewênena. Viraştişê kilîman a ke hem hetê ekonomî, hem zî hetê kulturî de qîmet viraznena, têkoşîn û tecrubeyê cinîyan zî vurnena.

	&nbsp;

	Nesîbe Ertaş (42) a ke tutîya xo ra yanî 30 serrî yo nê mîrasê ke keyeyê aye ra mendo domnena, derheqê viraştişê kilîman de ajansê ma rê qisey kerd.

	&nbsp;

	Pawitoxê mîrasê seserran

	&nbsp;

	Nesîbe Ertaş va ke viraştişê kilîman sey meslegî keyeyê xo musnaya û va ke tutîya xo ra na xebate kena. Nesîbe Ertaş a ke binê banê şaredarîya Serawî de mamosteya hunerê destan a va ke aye zaf xebata xo ra hes kena. Nesîbe Ertaş wina ard ziwan: “Ez meslegê xo ra hes kena, ez keyeyê xo ra musaya. 30 serrî yo kilîman viraznena. Verê mi na xebate keye de kerdêne. Dima ra 2010ine de bi hawayêk fermî xebitîyaya. No mesleg sey mîras keyeyê mi ra mi rê mend. Kilîmî adetêk verî yê. Ganî ma wayîr nê adetê seserre bivejîyê.”

	&nbsp;

	Viraştişê kilîman

	&nbsp;

	

	&nbsp;

	Nesîbe Ertaş a ke qalê viraştişê kilîman kerd, wina ard ziwan: “Goreyê viraştişê kilîman heme hacetî yenê kontrolkerdiş. Xêzkerdiş yeno amadekerdiş, neqş yeno weçînitiş û goreyê kilîman yeno eyarkerdiş. Layê kilîman peşmî ra yeno berardiş. Peşmî yena pakkerdiş, bi boyaxe yena boyaxkerdiş û dimayê ke ziwa benê semedê kilîman yenê şuxilnayîş.”

	&nbsp;

	

	&nbsp;

	‘Kilîmî hêvî, rewşa ruhî û kulturê cinîye yê’

	&nbsp;

	Nesîbe Ertaş va ke her neqşêk manaya ci est o û va: “Her neqşêk rewşa ruhêk mojneno. Kilîmî mesaj û haceyêk neqlkerdişî yê. Manaya kilîme wina saf û pak a. Nêeşkena bi çend vatişan vajî. Verê kilîmî sey hacetê neqlkerdişî şuxilyayîne. Kesî çîyanê ke nêeşkayî vajê kilîman ser o vatêne. Manaya neqşan tîya ra yena. Her neqşêk maneyêk ci est o. Kilîmî, ruhê cinîye, hêvî û kulturê cinîye qal kenê. Ez venga wayîrvecîyayîşê nê kulturî kena. Heta destê ma ra yeno ma hewl danê ke no kultur gane bikerê, xo biresnê cinîyan. Semedo ke no mîras vîndî nêbo ma hewl danê.”

	&nbsp;