Emîne Alkiş: Heta aştî nêro welatê ma do nêvinderê 

2026-06-09 09:54:54


	 

	ŞIRNEX - Dayîkanê Aştîye yê Sîlopîyî ra Emîne Alkişe da zanayene ke heta ke aştî nêro welatê înan ê nêvinderenê û va: “Çira nê çîyan kurdan rê kenê. Heta ke ma bibê, ma do xover bidê. Sey dayîke çi bikewo milanê ma ser, ma do bikerê.”

	 

	Meclîsê Dayîkanê Aştîye roja ke awan bîyo ra nata semedê aştîye xebata xo domîyeno. Dayîkê Aştîye ke bi serran o têkoşînêk bêmabêne rayra benê, prosesê ‘Aştî û Cimatê Demokratîk’ de serkêşîye kenê. Dayîka Aştîye ya Sîlopî Emîne Alkişe ke sey zafê cinîyan bi serran o têkoşînê aştîye dana, têkoşîn û cuye xo qal kerd.

	 

	‘Nêheqîyêk pîl bi’

	 

	Emîne Alkişa 65 serrî da zanayene ke 25 serrî yo xebatan de ca gêna û heme wezîfeyê ke kewtê milê aye ser, kerdê. Emîne Alkişe va ke 19 serrîya xo de bi berdêlî zewicîyaya û wina va: “20 serrîya xo de zî bîya dayîk. Vernîya ke tewrê xebatan bibî, mi zulmo ke ameyêne kerdene vînayîne. Nêheqîyêko pîl ameyêne kerdene. Mi nê qebûl nêkerdêne. Her ca yê dinya de her kesî bi ziwanê dayîka xo xo ardêne ziwan labelê ê ma ame qedexekerdene. Ma vera nê bêveng nêvindertî.”

	 

	‘Cuye ma bi têkoşîn vîyarte’

	 

	Emîne Alkişe va, serranê newe ke tewrê xebate bibî, nanê xo keye ra girewtêne û şîyîne xebatan û wina dewam kerd: “Ma keyeyêk welatparêz ê. Ez keyeyêkê wina de bîya pîl. Ma tu wext îxanet şarê xo rê nêkerd. Ma bêdayîk bîyî pîl. Ez bi berdêlî zewicîyaya. Cuye ma bi têkoşînî vîyart.”

	 

	'14 rojî mêrdeyê mi rê îşkence kerdî'

	 

	Emîne Alkişe dîyar kerd ke têkoşînê azadîya kurdan de birazayê xo vîndî kerda û va: “Di birazayê mi seba zulmî şîyî Ewropa. Serre 1994ine de tutê mi seba nêweşîye merd. Dikanêk ma yo qîjkek bi. Seba şînê ma girewtibi. Polîsan eşt keyeyê ma ser û va şima çira dikan anêkenê, şima terorîst ê. Mêrdeyê mi destbend kerdî û 14 rojî îşkence ey rê kerdî. Roja 16ine de sey merdeyêk eştî verê kêberê ma. “

	 

	‘Heta ke aştî nêro ma nêvindenê’

	 

	Emîne Alkişe bale ante prosesê aştî û cimatê demokratîkî ser û wina peynî ard: “Heta ke aştî nêro welatê ma, ma nêvindenê. Rayberê ma semedê aştîye her çî kerd. Labelê hema dewlete çîyêk nêkerdo. Şarê kurdî her wext binê zulmî de yo. Sey dayîkêk seba ke aştî pê bêro ma xebatanê xo rayîr ra benê. Nê çîyan çira kurdan rê kenê. Ma do heta peynî xober bidê. Çi destê ma ra bêro ma do bikerê.”