Vengê Wanî: Rayîrê aştîye azadîya serekîye ra derbaz beno 2026-06-04 11:14:09   WAN - Welatijê Wanî derheqê prosesî de qisey kerdî û dîyar kerdî ke seba ke proses aver şêro, ganî azadîya fîzîkî ya Rayberê Şarê Kurdî Abdullah Ocalanî pê bêro û ganî gamê lazimî lezkî bêrê eştiş.   Seba naskerdişê heqê hîvîye û azadîya fîzîkî ya Rayberê Şarê Kurdî Abdullah Ocalanî, waştiş mîyanê rojeve de cayê xo pawenê û seba ke prosesê "Aştî û cimatê demokratîkî" aver şêro, vengdayîşê eştişê gamê somutî yeno kerdene.   Wan de welatijan derheqê prosesê "Aştî û cimatê demokratîkî" de ajansê ma rê qisey kerd.   ‘Ma welatêk bêgonî wazenê’   Muhabbet Gore da zanayene ke ganî dewlete game bierzo û paştî bido prosesî û va: “Ma aştîye, çareserîye wazenê. Tu heqê înan çin bî ke nê çîyan bikerê. Nê merdimî gunay ê. Wa çareserîyêk bêra dîyene. Ma welatêkê bêgonî û aştîye wazenê. Ma azadîya serekê xo wazenê. O azad bo, aştî zî do bêra.”   ‘Ganî gamê lazimî bêrê eştiş’   Pinar Nazlî dîyar kerd ke ê şerê Îranî ra zaf tesîr bîyê û wina dewam kerd: “Eke ke prosesê aştîye ser nêkewo, şer do bêro Tirkîya zî. Şerê Îranî verê ma gêno. Aştî pê nêro, ameyoxê domananê ma orte de yo. Ameyoxê domananê ma çin o. Ganî gamê lazimî bêrê eştiş.”   ‘Ma wazenê serekê ma ma dir bo’   Hayat Kaba zî wina va: “Ma cuyêka pîya wazenê. Tena bi hewldayîşê serekî nêbeno. Ganî dewlete gamê lazimî bierzo. Wa Abdullah Ocalan azad bo û yewîye pê bêro.”   Gozel Erdemlî dîyar kerd ke ê aştî û têduştîye wazenê û seba pêardişê aştîye ganî heqê hîvîye seba Rayberê Şarê Kurdî Abdullah Ocalanî pê bêro.   ‘Ganî aştî pê bêro’   Suheyla Demîr dîyar kerd ke dewlete goreyê xo hereket kena û ganî mîyanê yewîye de gamî bêrê eştiş. Suheyla Demîr wina ard ziwan: Ganî ma bêrê pîya û aştîye pîya bîyarê. Ganî ma bêrê têhet û ma wayîrê prosesê aştîye bivecîyê.”   ‘Wa serekê ma azad bo’   Nurhane Demîr zî wina va: “Ma heq, ziwan, nasname û huquqê xo wazenê. Ma bi serran ant. Ma zî merdim ê. Ma zî heqanê xo wazenê. Wa heqê ma bidê ma.”   Xezal Hatîpoglu zî wina ard ziwan: “Ma aştîye wazenê. Ma têduştîye wazenê. Ganî Tirkîya lezkî game bierzo. Ma wazenê serekê ma bêro veradayîş.”