Bi 10 serrî yo eynî rayîrî de şina: Leyla Erşek

2026-05-26 11:12:13


	 

	Neslîhan Kardaş

	 

	ŞIRNEX - Leyla Erşek, dayîka Sabahat Erşek a ke demê qedexeyê vejîyayîşê teberî yê Hezexî de dinyaya xo bedelnaye, nê 10 serrî yo ke her hewte şina Deştadarê, bajarêko ke kênaya aye tede ameya nimitiş.

	 

	Şarê kurdî erdê xo ser de şahîdîyêka bêhûmar ê trajedîyan kerda. Her yew nê trajedîyan rêça xo verdaya, her yew înan metodê xoverdayîşî û mîrasê cîyayî peyê xo de verdayî. Labelê yew mîraso hempar xoverdayîş bî. Sabahat Erşek (Jiyan Hêlîn Koçer) ke serra 1985ine de qezaya Hezexê ya Şirnexî de ameya dinya, yew nê cinîyan bî ke beyraqa xoverdayîşî mîyanê cinîyanê kurdan de berz kerde. Sabahat Erşek yew nê cinîyan bî ke demê qedexeyanê vejîyayîşê teberî yê Şirnex û qezayanê ci yê mîyanê serranê 2015 û 2016ine de ameye kiştene. Semedê qedexeyanê vejîyayîşê teberî, keyeyê Sabahat Erşek ke Hezex de ciwîyena, nêeşkayî kênaya xo qeza de binimnê û o bajarokê Deştadarî ke nêzdîyê 25 km dûr o, nimit.

	 

	Pêwa nê heme serran zî, rayîrê dayîkêke nêbedilîyayo: Leyla Erşek… Dayîkêke ke semedê qedexeyî nêeşkaya kênaya xo zî qezaya ke tede ciwîyena de defin bikero, û nê 10 serrî yo ke her hewte raywanîyêke kena.

	 

	Leyla Erşek ke a roje ra nat her hewte eynî raywanîye kena; tayê rey binê varanî de, tayê rey germayîya zêde de, aye resena gorê kênaya xo û bêveng destê xo dana erdî ser. Bi her serdanî, hîkayeya dayîkêke ke cuye kilmêr, vatişê peyênî yê nêvatî û serranê dejê bêpeynî gêna xo ser, sey xoverdayîşêko vera vînîkerdişê vîrî ke herême de pîya bi qedexeyan pîl bîyo, dewam kena. Leyla Erşek vana ke dejo tewr pîl şîyayîş bixo yo. A vana demo ke kênaya aye şîye, aye zanayîne ke tenê cesedê aye do bimano.

	 

	Leyla Erşek ajansê ma rê derheqê kênaya xo Sabahat Erşek û cuye xo ya ke nê 10 serranê vîyarteyan de mîyanê bajar û dewe de vîyarta, qisey kerd.

	 

	‘Cuye aye her wext serê têkoşînî bîye’

	 

	Leyla Erşek qisey kena ke kênaya aye Sabahat verê mergê xo di serrî zindan de mendebî û wina va: “Dimayê ke zindan ra vejîya, cuye aye her wext serê têkoşînî bîye. Aye her wext xo sûcdar kerdêne, endîşe kerdêne ke aye seba şarî çîyêk nêkerdo. Çend serrî dima, aye tewrê PKK’yî bîye. Aye di serrî koyan de mende. Dima ra aye ameye Hezex. Aye 6-7 aşmî Hezex de mende. Mi qet nêzanayîne ke aye ameya bajar. Aye nê ma ra nimit. Dima ra rojêke aye ameye taxa ma. Aye ma vîna, labelê aye qet keye de ma dir nêmende. Demo ke merdiman ci ra pers kerdêne çira aye verê dadî û babîyê xo de nêmanena, aye zî vatêne, ‘Hevalê mi est ê, ez senî eşkena dadî û babî xo dir bimana?’”

	 

	‘Ma muracaatê dozgerîye kerd’

	 

	Leyla Erşek dîqet ant ser ke qedexeyê vejîyayîşê teberî yê Şirnex û qezayanê ci ke ameyî eşkera kerdene Hezex zî mîyanê xo de gênê û nê qedexeyê vejîyayîşê teberî de dinyaya xo bedelnena û va: “Semedo ke Hezex de qedexeyê vejîyayîşê teberî est bî, ma nêeşkayî aye uca de defin bikerê. Naye ra ma aye tîya de defin kerd. Ma demêk verê cû seba ke cenazeya aye berê uca muracaatê dozgerîye kerd, labelê ma hema zî netîceyêka pozîtîf nêgirewta. Ez êdî nêeşkena şîrî û bêrî, ez pîr bena. Tayê rey her hewte, tayê rey di hewteyan de reyêke yena. Demo ke ez wesayîtêk vînena, bi wesayîtî yena, labelê tayê rey zî bi lingan şina. Nika ez şiyayîş û ameyîş de zaf zehmetî ancena.”

	 

	‘Wa aştî bêra awankerdiş û ma pêro pîya bi aştî bîciwîyê’

	 

	Peynî de, Leyla Erşek behsê prosesê Aştî û Cimatê Demokratîkî kerd û wina va: “Nika behsê prosesêk aştîye yeno kerdene. Ez zî paştî dana nê prosesî. Ez wazena aştî bêra awankerdiş û ma pêro pîya bi aştî bîciwîyî. Ez wazena Birêz Abdullah Ocalan azad bo û şarê kurdî dir bibo.”