‘Ma wazenê tutê ma bi kultur û ziwanê xo pîl bibê’ 

2026-05-25 09:05:40


	 

	Buşra Turan

	 

	AGIRÎ - Dengbêje Hanım Sezan dîqet ant serê polîtîkayanê asîmîlasyonî û da zanayîş ke ganî domanî bi ziwanê xo perwerde bivînê û va: “Kurdkî nasnameyê ma ya. Ganî domanê ma bi ziwan û kulturê xo pîl bibe.”

	 

	Polîtîkayê asîmîlasyonî yê serê ziwanê kurdkî dewam kenê. Perwerde ra bigîre heta heme wareyanê cuye, Kurdkî rî bi rî zextan yena û heqê perwerdeyê bi ziwanê dayîke pê nîno.

	 

	Dengbêje Hanım Sezan dîqet ant serê zextanê serê ziwanê kurdkî û da zanayîş ke dengbêjîye mîyanê vurnayîşê tarîxê kurdî de rolê ci zaf pîl a.

	 

	‘Ganî domanê ma bi ziwanê xo pîl bibê’

	 

	Hanım Sezan eşkera kerd ke ganî ziwanê kurdkî bêro pawitiş û dîqet ant serê muhîmîya ziwanî û wina va: “Kurdkî ziwanêko weş o. Serkêşanê ma ziwanê ma da ciwîyayîş û heta ewro ardî. Heqî no ziwan dayo ma. Şêxanê ma, meleyanê ma kurdkî heta ewro arda. Medresan de bi nê ziwanî perwerde dayê. Şêx Seîd, Seyîd Riza, Qazî Mihemmed, Ehmedê Xanî û Melayê Cizîrê ziwanê ma pawito û heta ewro ardê. Ma her wext bi ziwanê xo est bî. Semedê ke ziwanê ma vînî bikerê, bi hezaran ciwanê ma kiştî. Hema zî kişenê. Zextan serê ziwanê ma de kenê, asteng kenê. Labelê ma wazenê domanê ma bi ziwanê xo, bi kulturê xo pîl bibê.”

	 

	‘Ganî domanê ma bi ziwanê xo perwerde bivînê’

	 

	Hanım Sezan dîqet ant serê ziwanê kurdkî û va ganî kurdkî biba ziwanê fermî yê perwerde û nê çîyî ardî ziwan: “Mekteban de serê domananê ma de zextî est ê. Mektebanê dewlete de ziwanê kurdkî çin o. Ma wazenê kurdkî biba ziwanê fermî yê perwerde.”

	 

	‘Kulturê Kurdan de adetê dengbêjîye’

	 

	Hanım Sezan rolê dengbêjîye ya mîyanê kulturê kurdan ser o vinderte û wina peynî arde: “Ziwan û tarîxê kurdî bi kilaman ameyo nê rojî. Bi dengbêjîye ziwan û kulturê ma est bîyo. Dengbêjîye çin bîyêne, kultur û ziwanê ma do vînî bîyêne. Rolê dengbêjîye zaf pîl o.”