Gimgim de nobeta xoza: Semedê xoza zî aştî lazim a 

2026-05-23 11:21:59


	 

	MÛŞ - Cinîyê ke 19 rojî yo vera projeyê JES’î yê qezaya Gimgimî ke wazeno bêro kerdene, nobet de yê wina vatî: “Pêwa prosesê aştîye vera xozaye şer dayê destpêkerdene. Eke çalî bêrê akerdene, şar do koçber bibo. Ganî aştî bi qiseykerdişî nêmano, ganî aştî seba heme xozaye bêra. Xoza çin bo ma zî do çin bi. Ganî ma têkoşîn pîl bikerê.”

	 

	Nobeta konronayîşê dewa Xwarikî ya ke girêdayeyê qezaya Gimgimî ya Mûşî ya û vera projeyê Santralê Enerjîya Jeotermal (JES) ameya destpêkerdene, roja xo ya 19ine de dewam kena. Wareyê nobete ke bi serkêşîya Meclîsê Ciwanan ê Platformê Ekolojî yê Gimgimî ameya destpêkerdene, pankartê sey “Kedwerdî meke, xozaye xilas meke” û “No hard mîrasê kal û bavikan o. Bavokê ameyoxî yo, JES newazenîme” ameyê daliqnayîş. 6 deweyê ke do projeyê JES'î ra tesîr bibê, seba pawitişê xozaya xo, xo rêxistin kerdê û her roj 2 dewî seba 24 saetan nobete ginê. Eşkerayîyê ke ameyê dayîş de yeno dîyarkerdiş ke cografyaya Kurdistanî serran o bi projeyanê maden, awbend û enerjî yena talankerdene.

	 

	Îdarekara Komeleya Elewîyan a Demokratîk a Îzmîrî Nebet Çelîk, endama meclîsê Partîya Têduştî û Demokrasî yê Şaran (DEM Partî) Sanem Dapakli û hemsereka Komeleya Ekolojî ya Wanî Perîhan Sogukbulak derheqê babete de qisey kerdî.

	 

	‘Ganî her kes wayîrê erdê xo bivecîyo’

	 

	Nebet Çelîk da zanayîş ke seba têkoşînê vera projeyê JES’î yê Gimgimî Îzmîr ra ameyê û va ganî şar vera projeyî wurzo serê lingan û xover bidê. Nebet Çelîk wina eşkera kerd: “Ma hewl danê ke wayîrê tîya bivecîyê. Ma seba pawitişê erdê xo ameyî tîya. Ma çiqas bajaran de bîciwîyê zî ma beşêk nê erdî yê. Ma serê erdê xo de xo baş hîs kenê. Vîr û ameyoxê ma tîya de yo. Ma roja ewilî ra nat yenê konê xoverdayîşî. Wa her kes wayîrê erdê xo bivecîyo. Ganî ma xover bidê û têkoşîn bikerê.”

	 

	‘Xoza çin bo ma zî do çin bê’

	 

	Nebet Çelîk aşkera kerd ke xoza çinbo ê zî çin ê û wina dewam kerd: “Xoza û cinî têduşt ê. Verê cû cinîyan bi nebatanê mîyanê xoza arêdayîne û şîfa vila kerdêne. Bi çinbîyayîşê xoza do her çi çin bo. Heme dermanî xoza ra yenê viraştene. Xoza her çi ya. Ma wareyanê xozaya xo çin nêkerê. Na xoza û nê dermanî çin bi, ma do zî çin bi. Ma do têkoşînê xo bidomnê.”

	 

	‘Hêtêk ra vanê aştî, hêto bîn ra zî vera xoza şer danê destpêkerdene’

	 

	Nebet Çelîk dîqet ant serê prosesê ‘aştî û cimatê demokratîkî’ û wina peynî ard: “Proses yewhetî rayra şono. Cayo ke aştî tede bibo, ganî şer temamî orte ra wurzo. Ganî tena seba merdiman nê, seba xoza zî aştî bêra. Hêtêk ra vanê aştî, hêto bîn ra talan kenê. Prosesê aştîye de gamê yewhetî yenê eştiş. Pêwa prosesê aştîye şer yeno domnayîş. No samimî nîyo.”

	 

	Seba têkoşînî vengdayîş

	 

	Sanem Dapakli nêrazîbîyayîş vera projeyê JES’î mojna û wina peynî ard: “Ez Gimgim ra ya. Ma nê projeyî nêwazenê. 24ê Nîsane ra nat çalakîyê ma dewam kenê. Ma nobeta konî de yê. Ma paradîgmayê ekolojîk ê cinîyan esas gênê. Ganî ma têkoşînê xo pîl bikerê.”

	 

	Perîhan Sogukbulak zî dîqet ant serê projeyanê ke Tirkiya û Kurdistan de yenê caardiş û va herêma Serhedî de 45 projeyê GES’î est ê û nê dir pîya zafê projeyê bînî zî yenê plankerdene. Perîhan Sogukbulak ard ziwan ke nê projeyî zirarêko pîl danê herême.