Cinîyê Payîzava: Ma wazenê Serekê ma verê ma de bo

2026-05-21 09:34:54


	 

	WAN - Cinîyê Payîzava yê ke Pêvînayîşê Wisar û Cinîyan de ameyî têhet, dîyar kerdî ke ganî azadîya fîzîkî ya Rayberê Şarê Kurdî Abdullah Ocalanî bêra caardiş û vatî: “Ma wazenê Serekê ma mîyanê ma de bibo. Çimê ma rayîrê Serekê ma de yo.”

	 

	Venga “Aştî û Cimatê Demokratîkî” ke Rayberê Şarê Kurdî Abdullah Ocalanî 27ê Sibata 2025’an de kerdbi, mûnaqeşeyanê aştîyêka mende ya Tirkîya û herême de reyna ard rojeve. Mûnaqeşeyê derheqê çareserîya demokratîke ya persê kurdî de domnenê û seba caardişê aştîye zî waştişê azadîya fîzîkî ya Rayberê Şarê Kurdî Abdullah Ocalanî yenê kerdene. Bala her kesî serê gamanê somutî yê ke ganî îqtîdar bierzo de ya.

	 

	Cinîyê Payîzava yê Wanî ke pêvînayîşê Wisar û Cinî de ameyî têhet, derheqê prosesî de qisey kerdî.

	 

	‘Aştî seba her di hetan zî hewce ya’

	 

	Murşîde Sonmeze da zanayîş ke ganî azadîya fîzîkî ya Abdullah Ocalanî bêra caardiş û wina domna: “Ma aştîye wazenê. Êdî bes o. Do heta key wina şêro? Aştî seba her di hetan zî hewce ya. Wa Serekê ma serbest veradê. Wa tepişteyan veradê. Ma ziwanê xo, nasname û heqanê xo wazenê. Seba ma azadî lazim a. Ma zaf ant. Êdî bes o.”

	 

	‘Ma serekîya xo wazenê’

	 

	Feruz Bulute destnîşan kerd ke dewlete derheqê prosesî de tu game nêeşta û wina ard ziwan: “Ganî dewlete lezkî game bierzo. Di serrî yo prosesêk ameyo destpêkerdene. Labelê hema zî dewlete game nêeşta. Ma rêça serekê xo de yê. Ma paştê serekê xo de yê. Ma bi ey bawer kerd. Ma her tim zî do bawer bikerê. Hêvîya ma aştî û azadî ya. Wa dayîkî nêbermê. Wa dayîkê gerîla û eskeran nêbermê. Wa dewlete game bierzo. Ma serekê xo wazenê. Ganî lezkî tecrîd wurzo û şert û mercê aştîye bêrê awankerdiş. Çimê heme şarê Kurdî rayîrê Rayberê şarê Kurdî yo.”

	 

	‘Ma wazenî Serekê ma bêro veradayîş’

	 

	Fatma Sertkaya zî dîyar kerd ke lajê aye 27 serrî yo tepişte yo û waşt ke ganî Rayberê Şarê Kurdî Abdullah Ocalanî bêro veradayîş. Fatma Sertkaya wina domna: “Ma aştîye wazenê. Ma cuyêka azade û rinde wazenê. Wa dayîkî nêbermê. Wa zîndanî bêrê akerdiş. Wa kes nêmiro. Wa Serekê ma azad bibo, dewlete lezkî game bierzo.”