‘Ganî dewlete êdî gamanê xo bierzo’ 

2026-05-19 10:27:29


	 

	Bûşra Turan

	 

	AGIRÎ - Cinîyê ke tewrê rayîrşîyayîşê “Gamêke semedê aştîye” bîyî, eşkera kerd ke seba aştîya cimatî ganî polîtîkayê tecrîdî peynî bê û vatî: "Azadîya ziwanî wazenê û heto bîn ra zî ganî tepîşteyê sîyasîyî serbest bêrê veradayîş."

	 

	Vengdayîşê “Aştî û Cimatê Demokratîkî” ke Rayberê Şarê Kurdî Abdullah Ocalanî 27ê Sibate de kerdbi  serrêke zêde ser o vîyart labelê pêwa nê hema zî dewlete gamêka pozîtîf nêeşta. Bi serkêşîya Partîya Têduştî û Demokrasîyê Şaran (DEM Partî) bi sehezeran kesî xeylêk bajaranê Kurdistan û Tirkîya de bi sloganê 'Gamêke semedê aştîye' rayîrşîyayîş organîze kerdî.

	 

	Sîyasatmedarê ke Agirî de yê derheqê prosesî de fikrê xo ajansa ma JINNEWS'î rê ardî ziwan.

	 

	'Ma nasnameyê xo wazenê'

	 

	Hemverfeka DEM Partî ya Agirî Çîgdem Gure, dîqet ant serê armanc û waştişanê cimatî yê rayîrşîyayîşî û dîqet ant serê aştî, nasname û azadîye û her kesî dawet kerd ke tewrê prosesî bibê û wina va: "Ma nê rayîrşîyayîşî seba awankerdişê aştîye, seba ke dewlete gama ver bi azadîye bierzo, seba azadîya fîzîkî ya Birêz Abdullah Ocalanî û seba yewbîyayîşê şaran organîze kenê. Ma êdî şer nêwazenê. Ma azadîye wazenê. Ma azadîya ziwanê xo yê dayîke wazenê. Ma nika aştîye wazenê. Ma nasnameyê xo, estbîyayîşê xo wazenê. Ma gamêka ver bi aştîye erzenê. Ma her kesî dawet kenê ke tewrê na gama samîmî û azadîwaze bibê."

	 

	Cuyêka pîya hewce ya

	 

	Îdarekara DEM Partî Marîfet Yakare waştişê pêameyişê cimatî û edaletî ardî ziwan û vengdayîşê awankerdişê cuyêka têduşt û pîya kerd, wina fikrê xo eşkera kerd: "Ma nê rayîrşîyayîşî seba aştî, demokrasî û cuyêka pîya organîze kenê. Waştişê ma her tim o yo ke tepîşteyê nêweşî serbest bêrê veradayîş û dayîkî nêbermê. Ziwanê azad, cuye azad, cuye pîya wazenê."

	 

	‘Ganî dewlete game bierzo’

	 

	Endama Meclîsê Cinîyan a DEM Partî Ayşe Karakuşe vengdayîş kerd dewlete gama çareserîye bierzo û tepîşteyan serbest verabido, û wina fikrê xo ard ziwan: "Dewlete hema zî game nêeşta û ma veng danê înan ke game bierzo. Armancê nê rayîrşîyayîşî o yo ke Birêz Abdullah Ocalan azadîya xo ya fîzîkî bi dest bikero. Armancê ma o yo ke dewlete gamêke bierzo. Ganî hevalê ma yê tepîşteyî bêrê veradayîş. Ma do heta ke Rayberê ma azadîya xo ya fîzîkî bi dest bikero, her kuçe û taxe de bigêrê."

	 

	‘Seba caardîşê Heqê Hêvî yenê rayîrşîyayîş’

	 

	Hemverfeka Federasyonê Cigêrayîşê Îslamî ya Mezopotamya (MÎA-FED) Solmaz Izden, dîqet ant serê aştîya cimatî û wina va: "Viraştişê aştîya cimatî de cinîyî do rol û mîsyonê xo kay bikerê. Vera şerî cinîyî do hemkarîya xo pîl bikerê. Ma seba azadîya fîzîkî ya Abdullah Ocalanî rayîr ra şinê. Ma cinîyî şer nê, aştîye wazenê. Ganî heme kes paştî bido aştîye. Ma seba caardişê 'Heqê Hêvî' rayîr ra şinê."

	 

	‘Seba rojanê weşan dest bidê yewbînan’

	 

	Îdarekara DEM Partî Fatma Zengîne zî waştişê xo ya aştîye wina ard ziwan: "Êdî bes o, wa aştî bêra ca. Wa êdî gonî nêrêjîyo. Labelê ewro ma vînenê ke aştî çin a, girewtiş û destbendkerdişî yenê ca. Ganî na babete zî peynî bêra. Ganî ma dest bidê yewbînan û seba rojanê xo têkoşîn bikerê."

	 

	Hemverfeka MEBYA-DER'î Perîhan Gelturan dîyar kerd ke seba nasname, ziwan û aştîye rayîr ra şinê û rayîrşîyayîş bi xo zî têkoşîn o.

	 

	Hasîbe Çarboga zî beşdarê rayîrşîyayîşî bî, eşkera kerd ke seba aştîye rayîr ra şinê, wazenê tepîşteyê sîyasîyî serbest bêrê veradayîş û ganî yewbîyayîş aver şêro.