
Dayîka Aştîye: Teslîmîyet nê ma aştîye wazenê 

2026-05-16 10:41:30


	&nbsp;

	Rozerîn Gultekîn

	&nbsp;

	AMED - Dayîka Aştîye Afîfe Kartale ya ke Anqara de pêvînayîşanê partîyanê sîyasîyan reyde ca girewte, wina va: “Ma seba aştî û têduştîye şîyî Anqara. Ma va destê aştîye derg bikerê. Înan zî va ma destê şima veng nêşirawenê. Ma nêwazenê gonî birijîyo. Ganî ma dayîkê leşker, gerîla û polîsî bêrê têhet. Ça beno wa bibo, ma seba aştîye amade yê.”

	&nbsp;

	Dayîkanê Aştîye rojanê vîyarteyan de Anqara de partîyanê sîyasîyan reyde pêvînayîşî kerdî. Dayîkanê Aştîye ra Behîye Yalçine, Afîfe Kartale û Muzeyyene Butune heyet de ca girewtî. Heyetî pêvînayîşanê partîyanê sîyasîyan reyde pabebîyayîşê xo ardî ziwan û derheqê prosesî de waştî ke her kes berpirsyarîye bigîro xo ser. Dayîka aştîye Afîfe Kartale ya ke heyet de ca girewtêne, derheqê pêvînayîşan de qisey kerd.

	&nbsp;

	‘Ma seba aştî û têduştîye şîyî Anqara’

	&nbsp;

	Afîfe Kartale eşkera kerd ke çarçewa prosesê ke dewam keno de şîyê Anqara û wina qisey kerd: “Ma seba aştî û têduştîye şîyî Anqara. Ma va destê aştîye derg bikerê. Birêz Ocalanî gamêke eşt û va ‘Wa aştî bêra ca’. Devlet Bahçelî va wa aştî bêra ca. Dewlete game nêerzena. Ma aştîye wazenê. Ma Anqara de bi kurdkî qisey kerd. Ma rind ameyî pêşwazîkerdene. Ma hîsê xo qal kerd. Ma laçikê sipî kerdî dîyarîyê înan. Ma êdî şer nêwazenê. Wa êdî cenazeyê tutanê kurdan û tirkan nêrê. Mi cenazeya kêna xo bi destê xo kom kerd. Wexto ke ma definkerdiş kerd, mi va wa bibo wesîleyê aştîye. Wa dayîkî hêsirî nêvarnê. Ma seba pêvînayîşê Îmralîyî muracatê wezaretê edaletî kerd. Nika ma pîya pawenê mesajê partîyanê sîyasîyan. Ma bîhêvî yê ke mesajê aştî û aramîye bêrê.”

	&nbsp;

	Seba aştîye bêrê têhet

	&nbsp;

	Afîfe Kartale peynîya qiseykerdişê xo de eşkera kerd ke ê heta peynî dimayê aştîye de yê û wina ard ziwan: “Wa berê zîndanan bêrê akerdiş. Înfazan veşnenê. Na aştî nîya. Wexto ke leşkerî mirenê dewleta tirke vana wa welat sax bo. Kezeba ma veşena ez welat se biko? Kezeba mi, qelbê mi birîndar a. Ma waşt ke dayîkê polîs û leşkeran bêrê têhet roşê û qisey bikerê. Ça de beno wa bibo, seba aştîye ma bêrê têhet û roşê, qisey bikerê. Wa proses weş bîvîyaro û aştî bêra.”

	&nbsp;

	Ma teslîmîyet nê, aştîye wazenê

	&nbsp;

	Afîfe Kartale peynîya qiseykerdişê xo de wina va: “Wa Birêz Ocalan bêro veradayîş. Wa serê maseyî de ronişo û o zî seba şarê xo sîyasat bikero. 60-70 mîlyon kurdî paştî danê ey. Kurdî senî seba maçê Amedî wuştî serê lingan, wa seba aştîye zî wurzê serê lingan û dest bidê yewbînan. Ma veng danê, wa êdî game bêra eştene, wa nêvajê ‘Wa gerîlayî bêrê teslîm bibê’. Ma teslîmîyet nê, ma aştîye wazenê.”

	&nbsp;

	

	&nbsp;

	&nbsp;