Aysel Dogan gorê xo ser o ameye yadkerdiş

2026-05-11 14:21:31


	 

	DÊRSIM - Sîyasetmedara kurde Aysel Dogan, serrgêra 4ine ya wefatê xo de gorê xo ser o ameye yadkerdiş.

	 

	Sîyasetmedara kurde Aysel Dogana ke çarçeweya prosesê çareserîya problemê kurdî de û Ewropa ra ameybî Tirkîya û Koma 2ine ya Aştîye de ca girewtibî, serrgêra 4ine ya wefatê xo de gorê xo ser o Goristanê Asrîye yê Dêrsimî de ameye yadkerdiş. Aktîvîstê Têgêrayîşê Cinîyanê Azadan (TJA), temsîlkarê Komeleyê Demokratîkî yê Elewîyan (DAD), Partîya Têduştî û Demokrasîyê Şaran (DEM Partî) û zaf welatijî tewrê aye bîyî.

	 

	Yadkerdiş bi rêzgirewtişî dest pêkerd. Dima ra zî Wekîla Dêrsimî Ayten Kordu qisey kerd û va ke Aysel Dogan semedê aştî û edaletî têkoşîn kerde û nê çî ardî ziwan: “Semedê cuyêka bi rûmetî ya şarê kurdî û şarê Tirkîya canê xo da. Semedê Dêrsimî zaf kede da. Kedêk aye ya pîl têkoşînî est a. Werrekna aye zî no prosesê aştîye bivînayîne. Ma zaf çî aye ra musayî. Semedê Dêrsimî tarîxêk bî. Do her wext rayîrê ma roşin bikero. Semedê ke ma kede aye bi aştî, bi cimatê demokratîk û azadîye tacdar bikerê ma do çîyê ke destê ma ra yeno bikerê û ma nê sozî danê aye û kesanê ke têkoşînê azadîye de dinyaya xo bedelnayî.”

	 

	Hemserekê DEM Partîye yê Dêrsimî Ozcan Ateş zî va: “Aysel Dogane semedê ziwan, bawerî û rastîya xo zaf kede da. Zaf zordarî aye ser o ameyî kerdiş la her rey va ‘Ez cinî ya, elewî ya, kirmanc a û no zî bes nîyo, dêrsimij a.’ Ma soz danê to ke heta aştî bêro ma do rayîrê to de bê.”

	 

	Dimayê qiseykerdişan, loqme ame vilakerdiş, çeraxî ameyî veşnayîş û qerenfîlî ameyî ronayîş.

	 

	Dima ra zî gorê yew awankerdoxa PKKyî Sakîne Cansizî ya ke 9ê çeleyê 2013ine de Parîs de amebî qetilkerdiş ame zîyaretkerdiş. Beşdarî qerenfîlan dayî gorê Sakîne Cansize ser o û çeraxî veşnayî.​​​​​​​​​​​​​​​​