Dosyaya Gulistan Doku de polîtîkayê bêcezaverdayîşî

2026-04-23 10:34:21


	 

	AMED - Baroya Amedî ra avûkat Ekîn Ozdemîr derheqê averşîyayîşanê dosyaya Gulîstan Dokuye de qisey kerd û bale ant polîtîkayê bêcezaverdayîşî, sîyakerdişê delîlan û tesîranê sîyasî yê ke dosya de ameyî domnayîş û va ke cînayetê cinîyan problemêk sîyasî yo.

	 

	Dimayê 6 serran derheqê dosyaya wendekara Zanîngeha Munzûrî Gulîstan Doku de averşîyayîşî ameyî ciwîyayîş û zaf kesî çarçeweya cipersayîşî de ameyî destbendkerdiş û tepiştiş. Baroyê Amedî ra avûkate Ekîn Ozdemîr derheqê dosyaya Gulîstan Dokuye de ercnayîş kerd.

	 

	Ekîn Ozdemîr dîyar kerd ke dosyaya Gulîstan Dokuye tena meseleya edlîye nîya, meseleya sîyasî ya û wina dewam kerd: “Şexsê hedîseya Gulîstan Dokuye de heme sucanê hemverê cinîyan ma eşkenê vajê ke sîyasî yê. Sey ke ma her wext vanê ganî ma vajê ke cînayetê cinîyan sîyasî yo. Şîdetê cinîyan ser o polîtîkayê bêcezaverdayîşî yê serdestîya mêrdan ra pê yenê. Dimayê 6 serran dosya de averşîyayîş pê ame. Ma ewnîyenê dosyaye, tena kesêk nîyo, çeteyê sucdarîya organîzekerdeyî vejîyeno orte. Gumanbarî îdarekardişê dewlete de zî ca gênê. Nê gumanbarî peyê xo danê mercîyanê xo û hemverê cinîyan şîdetê sîstematîkî kenê. Ma eşkenê vajê ke nê çeteyê sucdarî dewlete ra hêz gênê.”

	 

	Zelalbîyayîş û xoserbîyayîş

	 

	Ekîn Ozdemîr dîyar kerd ke ganî cipersayîş xoser, zelal û goreyê peymananê mîyanneteweyî bêro domnayîş û va: “Helwestê dewlete yê tîya ra dima muhîm beno. Ganî prosesê cipersayîşî zelal, xoser û bi tesîrî bêro domnayîş. Ganî goreyê Peymana Stenbolî û CEDAWyî têbigêrê. Polîtîkayê bêcezaverdayîşî cesaret dano gumanbaran. Hîn hedîseyî bi tesîranê sîyasî yan zî burokratîkî tarî yenê verdayîş û ver bi nêdîyarbîyayîşê kerdoxî şinê. Ma eşkenê vajê ke cînayetanê cinîyan de cipersayîş bi sîstematîk û bi zaneyî yeno binpaykerdiş.”

	 

	Zordarîya rayepêroyî…

	 

	Ekîn Ozdemîr dewam kerd û dîyar kerd ke gumanbarî polîtîkaya bêcezaverdayîşî ra cesaret û hêz gênê û wina dewam kerd: “No yeno normalkerdiş. Sey hedîseya Gulîstan Dokuye, gumanbarî wareyê sîyasî û burokratîkî ra hêz gênê û hedîseyan bi rehetî kenê, delîlan bi rehetî çin kenê. Mekanîzmayê edlîye zî heta zordarîya rayepêroyî çin bo bi tesîrî pê nîno. Dosyayê sucanê hemverê cinî û tutan zafê reyan yenê girewtiş yan zî bi tesîrî nînê cipersayîş. No zî metodê huqûqî rê zirar dano.”

	 

	Ekîn Ozdemîr peynîya qiseykerdişê xo de nê ercnayîşî kerd: “Bi serran o dosya de tu averşîyayîş çinbî. Serê hedîse ame girewtiş. No zî îdîayan xurt keno. Bi hawayêk organîzekerdeyî û bi zaneyî sereyê dosya ame girewtiş. Averşîyayîşan ra zî no yeno dîyayîş. Na rewşe tesîranê sîyasî ra xoser nîya. Kesê ke tewrê hedîse bîyî ra yew walî, yê bînî polîs, yê bînî polîsê ke ame îxrackerdiş û têkilîyanê xizmtîye yê. Her yew têkilîyêk înan bi organê merkezî yê ke dewlete dir est ê. Hêz dewlete ra ame girewtiş û no cînayet ame kerdiş.”

	 

	Ekîn Ozdemîr bale ant dosyaya Rojîn Kabaîşe û Rojwelat Kizmaze û va ke cipersayîşêk bi tesîrî nêame domnayîş û bi qerarê sînorkerdişî zelalbîyayîşê prosesî ame astengkerdiş.

	 

	Ekîn Ozdemîr wina qedêna: “Nê dosyayan de zî mekanîzmaya edlîye bêyî ke vajê no reseno kamî, ganî cipersayîşêk bi tesîrî bidomîyo semedê tesîskerdişê edaletî heme berpirsîyaran bigîro xo ser.”