Manîsa de meymanxane de nîjadperestî  

2026-04-22 10:08:14


	 

	Berîtan Tunç

	 

	MANÎSA - Manîsa de wendekarêke cinî meymanxane de mendêne, nasnameyê aye yê kurdî hedef ame girewtiş û bi zordarî û vatişanê nîjadperestî rî bi rî mende. Wendekara ke muracatê şaredarîya qeza kerd, temsîlkarê şaredarî cewabê “eke ancî problem bibo her di hetê zî do wargeh ra bêrê vetiş” da.

	 

	Wendekarek cinî Manîsayî de meymanxane de mendêne, hevalê odaya aye nasnameyê aye hedef girewtî û rastê zordarî û vatişanê nîjadperestî ameye. Wendekara ke xo resna ajansê ma va ke munaqeşe serrastkerdişê oda ra dest pêkerd, dima ra hewl ame dayîş ke mudaxeleyê wareyê cuye bêro kerdiş.

	 

	Munaqeşe bi hedefgirewtişê nasnameyî dest pêkerd

	 

	Wendekare va ke munaqeşe verê semedê serrastkerdişê oda dest pêkerd û wina va: “Dima ra waştî ale bidaliqnê. Pêwa wareyê înan estbî, waştî nîvînanê mi ser o ale bidaliqnê. Mi zî va ‘bigîrê nîvînanê xo ser bidaliqnê.’ Nê vatîşî ser o ‘ti tirk nîya, ti çira nêwazena?’”

	 

	Wendekare dîyar kerd ke dimayê ke aye vata kurd a, vatişê înan zêde bîyî û wina dewam kerd: “Mi va ez kurd a. Nê ser o nasnameyê mi pers kerdî. Vatî ‘senîn ti tirk nîya, nasnameyê to de çi nuşto?’ Bi nê vatişan mesele vurîya û zordarî mi ser o kerdî.”

	 

	Helwestê bêtêduştîye zêde bîyî

	 

	Wendekare dîyar kerd ke dimayê çîyê ke ameyî ciwîyayîş helwestê meymanxaneyî vuryayo û wina va: “Yê ke verê silam dayîne dima ra nêdayî. Ale ber de daliqnayî. Wareyê hembeşî de zî hedef ameya girewtiş. Ez şîya şaredarîye. La şaredarî va ‘eke ancî wina çîyêk bibo ma do her di hetan zî meymanxane ra vejê. Aramîya meymanxaneyî xira meke.’ La tîya de yê ke rastê zordarî ameye ez bîya. Dibistana mi qeza de ya. Eke ez meymanxane ra bêrî eştiş, ez do şêrî ça? Îdarekardişê meymanxaneyî zî na mesele de helwestêk bi tesîrî nêmojna ra.”