Keyeyê Gulistan Dokû: Tuncay Sonel wa bêro muhakemekerdiş 2026-04-16 12:07:36   DÊRSIM - Waya Gulistan Dokû, Şîlan Dokû destnîşan kerd ke dimayê 6 serran dosya de averşîyayîşê ke virazîya xeylêk muhîm o û semedê paştîdayîşî venga cinîyan da. Şîlan Dokû sewbîna waşt ke walîyê o wextî Tuncay Sonel zî bêro muhakemekerdiş.   Çarçeweya cigêrayîşê vînîbîyayîşê Gulistan Dokû ya wendekara sinifa 2yîne ê Beşê Averşîyayîşê Tutan ê Zanîngeha Mûnzûrî yê Dêrsimî ke 5ê çeleyê 2020ine Dêrsim de vînî bîya, 13’ê Nîsane de 13 kesî ameyî destbendkerdiş. Kesê ke ameyî destbendkerdiş, îfadeyê înan hîna dewam keno. Sewbîna keyeyê Gulistan Dokû zî verê edliye de pabebîyayîşê xo dewam keno. Waştişê tewr gird ê keyeyî oyo ke walîyê o wextî Tuncay Sonel bêro muhakemekerdiş.   Waya Gulistan Dokû, Şîlan Dokû qisey kerd û veng da.   Şîlan Dokû ard ziwan ke nika 13 kesî zere de yê û va: “Nika 13 kesî zere de yê, la yê ke ganî zere de bibîyîne teber de yê. Tuncay Sonel hema zî teber de yo. Ma wazenê ke lezkî no kes bêro girewtiş û îfadeyê ey bêro girewtiş. Nika zere de çend kesî est ê, la serê çeteyî hema zî teber de yo.”     ‘Eger bivatêne beno ke Gulistane sax bîne’   Şîlan Dokû da zanayîş ke dimayê 6 serran dosya de averşîyayîşêk baş virazîya û wina dewam kerd: “La Tuncay hema teber de yo. Destê xo leqneno û gêreno. Ganî o kes teber de nêbo. Coka ganî o nika zere de bo, la o hema zî wezîfeyê xo ser o. Ey heme îqtîdarê dewlete bi hawayêk nêbaş şuxilna. Roja yewine ke keyeyê mi ame tîya, înan keyeyê mi kerd ablûqa. Înan heme delîl, kamera, kartî û her çî nimitî. Wexto ke keyeyê mi 5ê çeleyî de resa tîya, înan keyeyê mi re Gulistane sey xokiştiş mojna û hetta na saete zî vatî. O wext belkî Gulistane hîna sax bîne. Ma erebe dî. Ê çend rey pirde ser o şî û ameyî. Coka beno ke Gulistane o wext sax bîne.”   Venga semedê cinîyan   Şîlan Dokû dîyar kerd ke bi destê nê kesan heme delî ameyî vînîkerdiş û çinkerdiş û wina qisey kerd: “Walî semedê lajê xo bipawo heme delîlî vînî kerd. La ê nêeşkenê bipawê. Ma sey keye fek na dosya ra veranêdanê. Hetta esteyê waya mi nêdê ma ma tîya ra nêşinê. Sewbîna ez semedê paştdayîşê heme cinîyan zî sipas kena. Ê her tim verê ma de bî. Wa êdî cinî nêmirê. Wa kiştişê cinî û tutan sey xokiştiş nêro mojnayîş. Wa dest dergî cinî û tutan nekerê. Ewro bi xêrê cinîyan averşîyayîşêk wina virazîya û ma hetta na roje ameyî. Cinîyan tu wext ma tenya nêverda. Ma nêwazenê ke tîya ra tepîya zî ma tenya verdê. Wa kîşte ma de bê.”