‘Azadîya cinîyan girêdayeyê azadîya Abdullah Ocalanî ya’  

2026-03-31 10:02:22


	 

	
		ŞIRNEX - Cinîyan derheqê şertê xebata azadî ya Rayberê Şarê Kurdî Abdullah Ocalanî de qisey kerdî û dîyar kerdî ke hem azadîya cinîyan hem zî ya cimatî girêdayeyê azadîya Abdullah Ocalanî ya.
	
		 
	
		
			
				
					Prosesê “Aştî û Cimatê Demokratîk” yew serrî yo dewam keno û nê prosesî de averşîyayîşê muhîm Rojhelatê Mîyanênî û dinya de ameyî ciwîyayîş. Rayberê Şarê Kurdî Abdullah Ocalan prosesê aştî û cimatê demokratîkî dest pêkerd û nê prosesî de Têgêrayîşê Azadîya Kurdî gamanê muhîm eşt. Destpêkê prosesî ra heta nika şarê kurdî waştişanê xo ard ziwan. Sere de zî azadîya Abdullah Ocalanî yena waştiş. Cinîyan her firsetî de nê waştişî ard ziwan û dorê felsefeya “Jin, jiyan, azadî” ya Abdullah Ocalanî bîyî xelek û azadîya ci azadîya xo dî.
				
					 
				
					Cinîyan derheqê mesele de ajansê ma rê qisey kerdî.
				
					 
				
					‘Ma wazenê bi ziwan û nasnameyê xo biciwîyê’
				
					 
				
					Îdarekara Komeleya Piştîdayîş û Hetkarîya Keyeyê Kesanê ke Têkoşînê Şaristanîye de Merdimanê Xo Vîndî kerdî (MEBYA-DER) Kumrî Babat va ke aye têkoşînê azadîya kurdî de kênayêka xo vîndî kerda û bale ant prosesê aştî û cimatê demokratîkî û va: “Yew serrî yo prosesê aştîye dewam keno. Mesajê ke Abdullah Ocalanî ra yenê qeza, taxe, dewan de bi şarî dir yenê parekerdiş. Hezekî de zî ma 300 kombîyayîşê şarî organîze kerdî. Pêwa prosesî hema gamêke nêameye eştiş. Nê prosesî de PKK game eşt. Ganî êdî gonî nêrijo. Wa kes nêmiro, wa qetlîamî nêrê ciwîyayîş. Ma wazenê dewlete game bierzo. Ma wazenê bi nasname û ziwanê xo biciwîyê. Sewbîna waştişê ma çin o.”
				
					 
				
					‘Abdullah Ocalan azad nêbo, cinî zî cimat zî azad nêbenê’
				
					 
				
					Kumrî Babat dîyar kerd ke ganî sere de Rayberê Şarê Kurdî Abdullah Ocalan û heme tepişteyî bêrê veradayîş û wina qedêna: “Heta serekê ma azad nêbo, nasnameyê ma nêro naskerdiş, manaya prosesî zî çin a. Ma wazenê serekê ma bêro veradayîş. Azadîya ma girêdayeyê azadîya serekê ma ya. Serekê ma ma bi nasnameyê ma da naskerdiş. Bîyayîşê ma ey mojna. Serekê ma mifteyê azadîye yo.”
				
					
				
					 
				
					‘Ma azadîya serekê xo wazenê’
				
					 
				
					Îdarekara MBEYADERî Ayşe Hezer dîyar kerd ke aye têkoşînê azadîya kurdî de di tutê xo û di birayê xo vîndî kerdî û wina dewam kerd: “Azadîya Abdullah Ocalanî semedê dayîkan zaf muhîm a. Abdullah Ocalan vano cuye bi cinîyan ameye awankerdiş û vano cinî têkoşînî rê serkêşî kenê. Ma azadîya serekê xo wazenê. La hema Tirkîya game nêeşta. Ganî mesajê Abdullah Ocalanî verê çiman de bêrê girewtiş. Ma şer nê, aştî wazenê.”