
‘No bêhuqûqî zirar dano prosesî’  

2026-03-27 15:32:31


	&nbsp;

	AMED - Eşkerayîyêka heyê TUAY-DERî ra ameye dayîş de, destbendkerdiş û tepiştişê dimayê pîrozbayîyanê Newroze şermezar kerdî. Eşkerayîye de qetî kerdî ke operasyon bêqanûn o û no bêhuqûqî tesîrê prosesî ser o keno.

	&nbsp;

	Bi serkêşîya Komeleya Hetkarîya Keyeyê Tepişteyan (TUAY-Der), derheqê destbendkerdiş û tepiştişê dimayê pîrozbayîyê Newroze, vernîya Edlîyeyê Amedî de eşkerayî ameye dayîş. Avûkatê Komeleya Huqûqnasanê Semedê Azadîye (OHD), Hemserekê Însîyatîfa Yewîya Demokratîk Mehmet Kamaç û zaf kesî tewrê eşkerayîye bî.

	&nbsp;

	‘Nê metodî tesîrê prosesî ser o kenê’

	&nbsp;

	Destpêk de Hemserekê Şubeya OHDyî yê Amedî Muhîttîn Muguç qisey kerd û dîyar kerd ke 3 rojê peyêne de zaf kesî bi muhakemekerdiş û cipersayîşanê bêqanûnî ra ameyî destbendkerdiş û va: “Ma şahidîye kerd ke senîn persê bêhuqûqî ameyî persîyayîş û senîn alê kesk, sûr û zerd sey bingehêk semedê sucdarkerdişî ameyî şuxilnayîş. Her çiqas ma zaf meseleyan de bi hêzanê asayîşî dir pê kerdibi û pîrozbayîyanê Newroza Amedî de rapor girewtib zî, ma sibayê bîn bi destbendkerdişî û tepiştişî şîyar bîyî. Ma Prosesê Cimatê Demokratîk û Aştîye de vîyarenê. Nê praktîkê bêqanûnî tesîrê prosesî ser o kenê.”

	&nbsp;

	‘Newroza 2026ine werçerxêk tarîxî ya’

	&nbsp;

	Dima ra Hemsereka TUAY-Derî Yeter Erel Tuma eşkerayî wend û va ke Newroza 2026ine yew roşanî ra zêde ya; nokteyêk werçerxîya tarîxî ya ke waştişanê şaran ê azadîye, yewbîyayîşî û têduştîye dîyar kena. Yeter Erel Tuma dîyar kerd ke no roşan hem xezîneyêk neteweyî yo hem zî pîrozbayîyêka ke mizgînîya wisarî dano û sembolê azadîya bindestanî ya û wina dewam kerd: “Pîrozbayîyêka bi muhîmîya sîyasî û komelîya xurtî ya ke yewbîyayîşê xo bi azadîya heme şarê Rojhelatê Mîyanênî dir dîyar kena. La çi heyf, coş û beşdarîya şarî nê prosesê manayîn de hetê nêrîyayîşanê negatîf û tepeserkerdoxî ra ame şikitiş. Bi seyan kesî sereştişanê nîmeyê şewî yan serê sibayî de ameyî destbendkerdiş, keye ameyî talankerdiş, çîyê înan ameyî talankerdîş û muameleyê bêmerdimîye înan ser o ame kerdiş. Kerdoxîyê wina îşkence yê û tesîrê prosesanê aştî û demokrasîyê yê dewam ê ser o kenê. Ma, sey sazî, cimat û keye nê demî de wazenê ke zîndanî bêrê vengkerdiş û heme tepişteyanê sîyasî lezkî bêrê veradayîş. Dewamkerdişê nê praktîkan hîsê aştî û asayîşê şarî zorê ci beno û endîşeyê prosesî ser o kûrêr keno. No rayîrê tepeserkerdişî vernîya beşdarîya şarî de prosesî de gêno.”

	&nbsp;

	Eşkerayî bi sloganê “Biciwîyo xoverdayîşê zîndanan” peynî bî.​​​​​​​​​​​​​​​​

	&nbsp;

	&nbsp;

	&nbsp;

	&nbsp;