HRANA: 24 saetan de 3 welatijan dinyaya xo bedelnaye

2026-03-18 15:10:33


	 

	MERKEZÊ XEBERAN - HRANAyî neql kerd ke 24 saetê vîyarteyî de hêrişanê hembeşê Îsraîl û Amerîkayî yê Rojhelatê Kurdistanî û Îranî ser de 3 welatijê sivîlî dinyaya xo bedelnayî û 4 welatijî zî birîndar bîyî.

	 

	Rêxistina Heqê Merdiman a HRANAyî raporêk bi bîlançoyê 24 saetê peyêne yê hêrişanê Îsraîl-Amerîkayî yê Rojhelatê Kurdistanî û Îranî ser o weşan kerd.

	 

	HRANAyî bîlançoyê vilakerde de neql kerd ke 24 saetê vîyarteyî de Îsraîl û Amerîkayî 17 bajaranê Rojhelatê Kurdistanî û Îranî ser o tewr tay 179 hêrîşî caardê ke 29 bingehê leşkerî, bingehê Supayê Pasdaranî, merkezê hêzê Besîcî, teyaregehê leşkerî, merkezê polîsan, bîrê neftî û wareyê enerjîya atomîyê Îranî bî.

	 

	Goreyê raporê HRANAyî netîceya hêrişanê 24 saetê vîyarteyî de Rojhelatê Kurdistanî û Îranî de 3 welatijê sivîlî dinyaya xo bedelnayî û 4 welatijê sivîlî zî birîndar bîyî. HRANAyî neql kerd ke zafaneyê hêrişan bajarê Tehranî, Îsfehanî, Şîrazî, Kerecî, Buşehrî, Ehwazî, Farîsî, Kirmaşanî, Pîranşarî, Tewrêzî, Urmîyeyî, Hemedanî, Qumî, Bender Ebasî ser o bî.

	 

	Rêxistina Heqê Merdiman a HRANAyî neql kerd ke destpêkê hêrişanê Îsraîl û Amerîkayî yê Rojhelatê Kurdistanî û Îranî ser o hezar û 354 welatijê sivîlî dinyaya xo bedelnayî ke 207 înan ra tutê binê emrê 18 serrî de yê.