Kewt qonaxê diyîne: Hêzê serkêş ê prosesî cinî yê 2026-03-02 10:28:10   Melîke Aydin   STENBOL - Hemsereka Partîya DEMî ya Stenbolî Arîfe Çinar dîyar kerd ke yewine serrgêra venga 27ê Sibate de proses kewto ‘qonaxê diyîne’, labelê hîna dewlete game nêeşta. Arîfe Çinar da zanayîş ke entegrasyonê demokratîkî do bi serkêşîya cinîyan bêro awankerdiş.   Venga tarîxî ya 27ê Sibata 2025ine ya Rayberê Şarê Kurdî Abdullah Ocalanî ser de yew serre derbas bî. Eşkerayîya peyên yê Rayberê Şarê Kurdî de ‘Sewîyeya negatîfî ra derbasê sewîyeya awankerdişê pozîtîfî’ vejîya vernî û eşkera kerd ke proses kewto qonaxêk newe.   Hemsereka Partîya Têduştî û Demokrasîyê Şaran (DEM Partî) Arîfe Çinar eşkera kerd ke qonaxê diyîne do bi gamê sîyasî û huqûqî aver şêrê û va hêza serkêş ê vurnayîşê demokratîkî cinî yê.   ‘Gamêka somut nêameye eştiş’   Arîfe Çinar dîyar kerd ke serrgêra vengdayîşî de mesajêk nuşte ame neqlkerdiş û no zî netîceya nêerzenayîşê gamê dewlete yo û va: “Eger samimîyet û radeyêk mîsîlemeyê yewbînan biameyîne mojnayîş, ewro do Birêz Ocalan bi veng û dîmenê xo xîtab bikerdêne. Na rewşe zî samimîyet û nêerzenayîşê gamê dewlete mojneno.”   ‘Entegrasyonê demokratîkî vurnayîşê komare yo’   Arîfe Çinar ‘entegrasyonê demokratîkî’ û ‘qanûnê aştîyê’ zî ercnayîş kerd û eşkera kerd ke komare bi kodê yewparêz ameya awankerdiş û wina ard ziwan: “Entegrasyonê demokratîkî yeno manaya ke esasê welatîbîyayîşê têduştî de bîyayîşê şaran, cinîyan, bawerîyan, nasnameyan bikewo binê asayîşê destûrê bingehîn. Komare dir pêkerdiş ne pêkerdişê bi polîtîkayê înkarî yo. Veradayîşê çekan bi tena sereyê xo yeno manaya aştîye. Ganî dewlete zî zîhniyet bivurno. Heta ke vurnayîşê zîhniyetî nêbo kulturê demokratîkî zî nîno awankerdiş.”   ‘Cinî hêzê serkêş ê demokratîkbîyayîşî yê’   Arîfe Çinar wina va: “Cinî çin yenê hesibnayîş. Şîdet înan rê yeno kerdiş. Cinî azad nêbê cimat zî azad nêbeno. No tenya slogan nîyo, no esasê vuryayîşş demokratîkî yo. Cimato ke cinî azad û têduşt biciwîyê şar zî do têduşt biciwîyo. Tirkîya de demokratîkbîyayîş do tesîrêk pozîtîf aştîya Rojhelatê Mîyanên ser o zî bikero. Prosesê yew serre muhîm o. Ma kewtî qonaxê diyîne. Ganî dewlete gamêka somut bierzo.”