‘Felsefeya jin jîyan azadî hemverê komplo de bî pawitişê cewherî’ 2026-02-14 11:12:06   Rozerîn Gultekîn   MERKEZÊ XEBERAN – Hemsereka TJA’yî Neslîhan Şedal dîyar kerd ke mîyanê 27 serran de komployê mîyanneteweyî paradîgmaya azadîya cinî hedef girewt û va: “Cinî paradîgma, wayîrvejîyayîşê serekî, pîlkerdişê têkoşînî komployî veng vet. Semedê azadîya fîzîkî ya serekî, ganî dorê paradîgmaya serekî de bi hawayêk xurt ma bibê yew, têkoşînê xo pîl bikerê û xo ver bidê.”   Netîceya komployê mîyanneteweyî yê 15ê Sibata 1999ine Rayberê Şarê Kurdî Abdullah Ocalan ame remnayîş û teslîmê Tirkîya ame kerdiş. Pêwa vengdayîşê "Aştî û cimatê demokratîkî" yê Rayberê Şarê Kurdî Abdullah Ocalanî yê 27ê Sibate de kerd zî tecrîd dewam keno û hema dewlete gamêke nêeşta. Têgêrayîşê Cinîyanê Kurdan hemverê komployê mîyanneteweyî xo rêxistin kerd û bi felsefeya ‘jin jiyan azadî’ cewabê komplo da.   Aktîvîsta TJA’yî û Hemşaredara Bajarê Girdî ya Wanî Neslîhan Şedal ya ke qeyûm tayîn vera ci ame kerdiş derheqê komployî û têkoşînê yeno domnayene de qisey kerd.   ‘Komplo veng ame vetiş’   Neslîhan Şedal dîyar kerd ke paradîgmaya demokratîk, azadîya cinî û ekolojîkî ya Abdullah Ocalanî xeylêk muhîm a û va modelê cuyayîşêke ke heme şar pîya bi hawayêk azad û têduşt ciwîyenê yê kerd cuye zî xeylêk muhîm o. Neslîhan Şedal wina ard ziwan: “Hetê nê modelî yê tewr muhîm esasgirewtişê azadîya cinî bî. Ya ke serkêşîya na paradîgma kerd cinî bî. Na paradîgma hemverê modelê hêzê modernîteyê kapîtalîst alternatîf bî. Wayîrvejîyayîşê na paradîgma komployê mîyanneteweyî zî veng vet.”   ‘Felsefeya ‘Jin jîyan azadî’ dinya rê vila bî’   Neslîhan Şedal bale ant felsefeya “Jin jîyan azadî” ser û na babete de wina ercnayîş kerd: “Serekî ercnayîşê xo de her tim vano têkiliyê cinîyan cuyayîş û azadî dir xeylêk xurt o. Na nokta de felsefeya ‘Jin jîyan azadî’ awan kerd û dinya rê vila bî. Dorê ‘Jin jîyan azadî’ têkoşînêk cinîyan ê enternasyonal vejîya orte. Vengê ‘Jin jîyan azadî’ berz bî. Rojawan de bi serkêşîya cinîyan şoriş pê ame. Xoverdayîş ame pîlkerdiş. Ma eşkenê nê ercnayîşî bikerê ke felsefeya ‘Jin jîyan azadî’ hemverê komployî de pawitişê cewherî bî.”   ‘Planê komployê diyîne veng ame vetiş’   Neslîhan Şedal eşkera kerd ke şexsê Rojawanî de hewldayîşê komployê mîyanneteweyî yê diyîne pê ame û wina va: “Şexsê Rojawanî de bi kilifê neweyî komployê mîyanneteweyî yê diyîne aver kewt. Eynî aktorî ancî ameyî têhet û hewl dayî Rojhelatê Mîyanên newe ra dîzyan bikerê, şarê kurdî kerdoxbîyayîşî ra vejê û kurdan bêîrade verdê. Nê ser o waştî planê newe bikerê dewre. Labelê planê înan yê  masayan ser o hetê Rayberê Şarê Kurdî Abdullah Ocalanî û şarê kurdî ra veng ameyî vetiş. Bi wayîrvejîyayîşê paradîgmayî komployê diyîne veng ame vetiş.”   Neslîhan Şedal tecrîdî ser o zî vinderte û wina ard ziwan: “Rewşêka aştîye ya mîyanê di hetan de est a. Nê semedî ra ganî şert û mercê têduştî bibê. Ma her tim va, binê şertê tecrîdî de proses baş nêeşkeno bidomîyo. Ganî heqê hêvîye pê bêro û azadîya fîzîkî ya serekî pê bêro. Semedê azadîya fîzîkî ya serekî, ganî dorê paradîgmaya serekî de bi hawayêk xurt ma bibê yew, têkoşînê xo pîl bikerê û xo ver bidê.”