‘Xoverdayîşê semedê Rojawanî do dewam bikero’ 

2026-02-05 10:38:26


	 

	Rozerîn Gultekîn

	 

	WAN - Hemverfeka DEKUP’yî Hanim Kaya dîyar kerd ke Rojawan emanetê Arîn Mîrkane semedê înan o û va: “Kurdan çar parçeyan rê vila kerdî. Labelê Rojawan her çar parçeyan ano têhet. Zîhnîyetê ke vanê teslîmbîyayîş do bi ser nêkewê, wa newe ra şer nêkerê dewre. Semedo ke ma teslîm nêbenê. Ma do çalakîyê xo yê semedê Rojawanî bidominê.”

	 

	HTŞ û çeteyê girêdayeyê Tirkîya 6ê Çeleyî de hemverê Rojawanî hêriş dayî destpêkerdiş û cuyayîşê hemparî yê Rojawanî hedef girewtî. Dimayê xoverdayîşê hemverê hêrişan 30ê Çeleyî de mîyanê Hêzê Sûrîyeya Demokratîk (HSD) û HTŞ’yî de adirbest û peymana entegrasyonî ameye îmzakerdiş. Destpêkê peymane ra heta nika venga ke kes xo rehet hîs nêkero, xoverdayîş bidomino, yenê kerdiş û sewbîna endîşeyê ke HTŞ do peymane bica bîyaro yan nê est ê.

	 

	Verfeka Platformê Sazgehê Demokratîk a Wanî (DEKUP) Hanim Kaya derheqê xoverdayîşê her çar parçeyê Kurdistanî û peymana ke ameya îmzakerdiş de qisey kerd.

	 

	‘Rojawan her çar parçeyan kerd yew’

	 

	Hanim Kaya da zanayîş ke Rojawan de 2014ine de xoverdayîşê hemverê DAIŞî bi serkewtiş netîce bîyo û va nika HTŞ bi eynî armancî qirkerdiş keno û va hêrişê înan ancî veng ameyê vetiş. Hanim Kaya wina ard ziwan: “Hemverê hêrişan her çar parçeyî bîyî yew zerrî. Rojawan şorişê cinîyan o. Semedo ke Rojawan her cayî de bi kirde. Rojawan cayê ke ‘cinî cuyayîş azadî’ ci de gane bîyo. Nê semedî ra zî çeteyî û hêzê mîyanneteweyî hêriş kenê. Şexsê Rojawanî de wazenê şarê kurdî bêveng bikerê, qir bikerê. Labelê Vakur, Başûr, Rojawan de şar bi xoverdayîşêk gird rawuşt, yewîye û wayîrvejîyayîş vejîya orte.”

	 

	‘Rojawan serkewtişê şarê kurdî yo’

	 

	Hanim Kaya dewam de ard ziwan ke Rojawan tenya sey parçeyêk herre ercnayîş rast nîyo û wina dîyar kerd: “Rojawan serkewtişê şarê kurdî yo. 2014ine de hemverê DAIŞî bi serkêşîya cinîyan têkoşînêk gird ame ciwîyayene. Rojawan sembolê xoverdayîşî yo. Yê ewro hemverê Rojawanî yenê kerdiş komployê mîyanneteweyî yê. Tirkîya û hêzê mîyanneteweyî piştîdayîş danê Tirkîya. Semedê çinkerdişê kurdan planî ameyî kerdiş. Kurdî ameyî qetilkerdiş, çinhesibnayî. Labelê pêwa nê kurdî tu wext bêveng nêmendî û do tu wext qirkerdişê ke wazenê bikerê pê nêro.”

	 

	‘Emanetê Arîn Mîrkan o’

	 

	Hanim Kaya dîyar kerd ke hemverê teslîmbîyayîşî bi xoverdayîşê Rojawanî ame averşîyayîş, destkewtişî ameyê bidestkerdiş û wina va: “Bi serkêşîya cinîyan hemverê teslîmbîyayîşî de Rojawan de serkewtiş vejîya orte. Verê ra yo teslîmbîyayîş kurdan rê ferz kenê. Labelê rastîyêk wina est a ke kurdî tu wext teslîm nêbîyê. Tîya ra û tepîya zî nêbeno. Rojawan emanetê Arîn Mîrkan o. Kurdan çar parçeyan rê vila kerdî. Labelê Rojawan her çar parçeyan ano têhet. Zîhnîyetê ke vanê teslîmbîyayîş do bi ser nêkewê, wa newe ra şer nêkerê dewre. Semedo ke ma teslîm nêbenê. Ma do çalakîyê xo yê semedê Rojawanî bidominê. Ma sozê xo yê wayîrvejîyayîşê Rojawanî ancî kenê.”