Nêweşxaneyê Hesekê de dermanî kêmî bîyê

2026-02-03 14:45:50


	 

	 

	MERKEZÊ XEBERAN- Dermanî Nêweşxaneyê Şarî yê Hesekê de kêm bîyê û nê semedî ra nêweşê talasemya û gurçikan nêeşkenê tedawî bivînê.

	 

	Nêweşxaneyê Şarî yê Hesekê yê kantonê Cizîrî de dermanî xeylêk kêmî bîyê. Ê goreyê îmkanê xo nêweşan pêşwazî kenê û înan tedawî kenê.

	 

	Îdarekarê Nêweşxaneyê Şarî yê Hesekê doktor Salar Ebulwehab Ebdullah ANHA'yî rê qisey kerd û agahî da ke dermanî semedê nêweşiyê talasemya, kanser û şitişê gurçikan xeylêk kêmî bîyê û ê xeylêk zehmetîyan ancenê. Sewbîna ard ziwan ke semedê ablûqa û hêrişan ê nêeşkenê nê dermanan peyda bikerê û wina dewam kerd: “Lazimîya ma bi derzenanê cerahî, dermananê gonî est ê. Semedo ke nêweşxane xebatanê xo dewam bikero û nêweşan pêşwazî bikero, lazimîya ma bi dermanan est a.”