Hîrê serkêşê têkoşînê azadîye Qamişlo de ameyî yadkerdiş

2026-01-07 14:36:55


	 

	MERKEZÊ XEBERAN – Hîrê cinîyê serkêş ê têkoşînê azadîye Sakîne Cansiz, Fîdan Dogan û Leyla Şaylemez 13ine serrgêra xo de Qamişlo de ameyî yadkerdiş.

	 

	Kongra Star bajarê Qamişloyî de bi munasebetê 13ine serrgêra şahadetê cinîyanê serkêş ê têkoşînê azadîye Sakîne Cansiz, Fîdan Dogan û Leyla Şaylemez yê ke Parîs de ameyî qetilkerdiş, semînerêk viraşt. Semîner merkezê Kongra Starî ya taxa Enterîyî ya Qamişloyî de ame viraştiş. Endamê komunan û temsîlkarê rêxistin û sazgehê cinîyan tewr bîyî.

	 

	Endama Kongra Starî Îbtîsam Hisên semîner de qisey kerd, bale ant têkoşînê Sakîne Cansiz ke Dêrsim dest pêkerdbî, rolê aye yê serkêşî yê xelasî û rêxistinbîyayîşê cinîyan de yad kerd û dîyar kerd ke şahadetê hîrê şorişgiranê cinîyan tesîrêko kûr şarê kurdî û têkoşînê înan ê semedê azadîye ser o verdayê.

	 

	Îbtîsam Hisên dîyar kerd ke cinî ewro sîyaset, edalet, pawitiş, perwerde û çapemenî de rolêko dîyar gênê û va ke cinîyê Vakur û Rojhelatê Sûrîye wayîrê hêzê îdarekerdişê prosesî yê.

	 

	Semîner bi sloganê “Şehîd namirin” û “Jin Jiyan Azadî” peynî bî.