Çeteleyê şîdetî yê serra 2025ine: 297 cinî ameyî kiştiş 2026-01-02 10:22:53             MERKEZÊ XEBERAN – Goreyê çeteleya şîdetî yê ajansê ma arê dayo, 2025ine de tewr tay 297 cinî û 29 tutî ameyê qetilkerdiş, 191 cinî û 28 tutî zî bi guman dinyaya xo bedelnayê.   Hêrişê hemverê destkewtişê cinîyan bi fesihkerdişê Peymana Stenbolî û hedefgirewtişê Qanûnê Hûmara 6284 hîna gird bî. Polîtîkaya bêcezakerdişî yê edaletî zî gumanbaran rê hîna zêde cesaret dano. Cinî bi hawayêko sîstematîk her roje hedef yenê girewtiş û hedîseyê ke çapemenîye de yenê dîyayene zî girdîya tabloyî mojnenê.   Goreyê dayeyanê ajansê ma yê mabêne aşma çile û kanûna 2025ine de tewr tay 297 cinî û 29 tutî hetê camêrdan ra ameyî qetilkerdiş, eynî demî de 191 cinî û 28 tutî zî bi guman dinyaya xo bedelnayî.   113 cinî hetê mêrdeyê ke înan dir zewicnayebî, 32 cinî hetê mêrdeyê ke fek yewbînan ra veradabî, 37 cinî hetê mêrdeyê ke sewîyeya destveradayîşî de bî ameyî qetilkerdiş. 12 cinî hetê babî, 20 cinî hetê lajanê xo ra, 7 cinî hetê mêrdeyê ke înan dir ciwîyenê, 26 cinî hetê mêrdeyê ke înan dir ê, 14 cinî hetê mêrdeyê ke înan ra visyayê, 34 cinî hetê nas-hevalan ra, 24 cinî hetê merdimanê xo ra ameyî qetilkerdiş. 3 cinî hetê mêrdeyê nênasan ra, 14 cinî hetê kesanê ke nasnameyê înan nêame dîyarkerdiş, 4 cinî zî hetê mêrdeyê ke nêzdîbîyayîşê înan nêdîyar ra ameyî qetilkerdiş.