Leyla Encu: Ma fek dewaya xo ra veranêdanê 

2025-12-26 11:18:43


	 

	Neslîhan Kardaş

	 

	ŞIRNEX - Leyla Encu ya ke qirkerdişê Roboskî de lajê xo Şervan Encu vindî kerde, dîyar kerd ke ê dewlete ra xêrcê dîyayîşê çîyêk nêwazenê û va: “Heta qiyamete fek dewa xo ra veranêdana. Ma do hesabê tutanê xo bipersê. Ma do her tim ser lingan de bê.”

	 

	Şewa 28ê Kanûna 2011ine de xeta sînorî ya dewa Bujeh û Roboskî ya qezaya Qilebanî ya Şirnexî de, hetê Hêzanê Çekdarî yê Tirkan (TSK) ra bi tayêreyanê şerî bombarduman ameyî kerdiş û 34 merdimî ameyî qetilkerdiş. Na hedîse ser o 14 serrî derbas bî. Pêwa hende demî derbas bî, ne berpirsyar muhakeme bîyî ne zî edalet bica ame.

	 

	Dayîka Şervan Encu ya 15 serre ke qirkerdiş de ame qetilkerdiş, Leyla Encu derheqê qirkerdişî de qisey kerd.

	 

	‘Semedê defter û qeleman bigîrê şîyî’

	 

	Leyla Encu da zanayîş ke ê ke qirkerdişî de ameyê qetilkerdiş hema tut bîyî û va: “3 kesî zewicnaye bî. Ê bînî pêro qij bî. 34 kesî semedê debara cuya xo şîyî uca. Pêro wendekarî bî. Semedê defter û qeleman bigîrê şîyî uca. Mecbûrî ê karî kerdêne. Îmkanê karî çin bî. Tutê ma pêro bêkar bî. Ê rayîrî rayîrê qaçaxî nêbî. Serbest şîne û ameyîne. Eke ma bizanayîne tutê ma do bêrê qetilkerdiş ma tu dem nêşawitêne uca.”

	 

	

	 

	‘Pêwa zanayîne dewijê qetil kerdî’

	 

	Leyla Encu wina va: “Ma bi nê bawer nêkenê. Bi zanayîş tutê ma qetil kerdî. Tutê ma di komî bî. Tayêreyan gule înan ser o varnayî. Koma yewine parçe-parçe kerdî, pêro veşnayî. Yewê ci ra koma yewine ra xelas bî agahî da koma dîyîne. Vatî xo xelas bikerê tayereyî do şima qetil bikerê. Koma dîyine zî texmîn nêkerd. Waştî hevalanê xo xelas bikerê. Labelê ê zî ameyî qetilkerdiş. Tayêreyan 45 deqeyan înan ser o bomba varnayî. Pêwa zanayîne dewijê bombavaran kerdî.”

	 

	‘Gumanbar nîşanê ma nêda’

	 

	Leyla Encu bale ant ser cigêrayîşê edaletî û wina dewam kerd: “Ma şîyîne Anqara, Stenbol, Amed. Serekkomar xo nimitêne. Nêame ma dir nênişna ro. 14 serrî derbas bî. Dejê ma teze yo. Tu dem dejê ma vîr ra nêşono. No qirkerdişêko gird bî. Heta qiyamete ma do fek dewaya xo ra veranêdê. Ma do hesabê tutanê xo bipersê. Behsê aştîye kenê. Wa aştî bêro êdî dayîkî mebermê. Labelê bawerîya ma çin a.”