Rayberê Şarê Kurdî ra derheqê problemê cimatî de erjnayîş

2025-12-10 14:14:35


	 

	MERKEZÊ XEBRAN- Rayberê Şarê Kurdî Abdullah Ocalan pêvînayîşo peyên de bale anceno hedîseyanê serran peyênan ke komelî de vêşî bîyê ser o û o wazeno ke problemê komlekî bi rayîrê şîdetî ney bi rayîrê aqil û şîretî bêrê çareserkerdene. Abdullah Ocalan seba ke vernîya nê meseleayn bêra girewtene, wazeno heme kesê haydarî na babete de rol bigîrê.

	 

	Şer û pirodayîşê ke mîyanê keye, şaristan û eşîran de vejîyenê êdî benê problemêkê komelkî. Demanê peyênan de bi taybetî Wan û xeylê şaristananê bînan de problemê zaf şenikî zî benê pêlêkê şîdetî û no tesîrêko negatîf têkilî, aştî û aramîya komelî ser o keno. Goreyê agahîyanê ke Komîsyonê Partîya Têduştî û Demokrasî ya Şaran (DEM Partî) ê Îmraliyî ra ameyê girewtene, no problemo komelkî bala Rayberê Şarê Kurdî Abdullah Ocalanî zî anta. Rayberê Şarê Kurdî Abdullah Ocalanî bale anta tehlukeyênê problemî ser o û vengdayîşê haydarîya komelkî kerdo.

	 

	Goreyê agahîyanê ke Komîsyonê DEM Partîyî dayê, Rayberê Şarê Kurdî Abdullah Ocalanî bi rayîrê çapemenî hedîseyanê komelkî taqîb keno û vêşbîyayîşê hedîseyanê mabênê kes, keye û eşîran bala ey anta. Rayberê Şarê Kurdî Abdullah Ocalanî pêvînayîşî de derheqê nê babetan de Komîsyonî ra agahîyî waştê û bale anta nê babetan ser o: “Mi ra aseno ke şîdetê mîyanê komelî rewşêka awarte de vêşî beno. Bi tayberî şîdetê hemverê cinîyan astêka berze de yo. Ez zaf nê çîyî verkewta.”

	 

	Rayberê Şarê Kurdî Abdullah Ocalanî pêvînayîşî de dîyar kerdo ke babeta ke do tewr zaf ser o vindero şîdeto ke mîyanê komelî de vêşî bîyo û ney zî wina erjna: “Sebebêko min o bîn ke ez prosesî ser o zaf vindena no yo ke ez bieşka dest bierza nê probleman û çareserîya înan ser o vindera. Eke ma merheleya yewin a Prosesê Aştî û Komelê Demokratîkî ra vîyarê do dore bêra nê meseleyan zî. Ez cehd kena ke demêko kilm de wandê des wezaretan bixebitîya. Babeta ke ez do ewile ser o vindera zî do şîdetê mîyanê komelî de ba. Ganî hemverê na babete de tedbîrê yasayî, komelkî, exlaqî û kulturî bêrê girewtene.”

	 

	Derheqê çîyanê de ke ganî bilez bêrê kerdene zî Rayberê Şarê Kurdî Abdullah Ocalanî veng da heme kesanê ke ey goşdarî kenê, kerdê û wina vat: “Ez kesanê ke mi goşdarê kenê, înan ra vana ke hemverê yewbînan bi hewayêko exlaqî çekan ra fek veradê. Ganî şima vatişêk zî nêkerê ke şima dejneno. Probleman bi aqil û qiseykerdişî çareser bikerê. Ez şîdetê mîyanê keyeyî de, mabênê keyeyan de, mabênê eşîran de û mabênê komel û şaristanî de red kena û teberê exlaqî vînena.”

	 

	Rayberê Şarê Kurdî Abdullah Ocalanî vengdayo heme kesanê haydar ke hemverê şîdetî rol bigîrê milanê xo ser o û hemverê nê problemî xover bidê. Rayberê Şarê Kurdî Abdullah Ocalanî na mesela de zî nê mesajî dayo: “Heme kes û embazê ke wazenê na babete de berpirsîyarî bigîrê zî ganî sey berpirsîyarîyêka exlaqî bivînê û asta tewr berze de rol bigîrê. Ez nê çîyî heme welatperwer, embaz û hemrayan ra wazena. Mi verê zî vatêne ma destûre nêdê, tena kesêk zî nê prosesî de cuya xo vîndî nêkero ma serkewte benê. Nê semedî ra ganî no şîdet bideqîyo ke komelê ma parçe keno û şîdet hetêkî ganî vatişêk nêro kerdene ke merdim pê dejeno.”

	 

	Berpirsîyarîya sîyasetî ya na mesela de zî Rayberê Şarê Kurdî Abdullah Ocalanî waşto ke têkoşînêko xurt bêro dayene. Rayberê Şarê Kurdî Abdullah Ocalanî sebebê nê şîdetî sey bêrêxistinbîyayîş pênase kerdo û bale anta nê nuqtayan ser o: “Mi çend reyî hişyarîyî kerdê. Ganî komel bêro rêxistinkerdiş. Heta yewîya tewr şenik a komelî bêra hîrakerdene, rêxistinbîyayîş lazim o. No komel, komelêko winasîn nîyo ke bêro îhmalkerdene. Têkoşîno tewr pîl ê demokrasî rêxistinkerdişî şarî yo.”

	 

	Rayberê Şarê Kurdî Abdullah Ocalanî pêvînayîşî de bale anta rolê DEM Partî yê sîyaset û rêxistinkerdişê komelî ser o û wina domnayo: “Merheleya dîyin a prosesî de ez do na babete reyde bixejilîya. Potansîyelêko gird ê DEM Partî est o. Lazim o xo ra bawer ba. Partîyêka dîyarker a. Wazeno wa tifaqê Cumhur, wazeno wa yê Mîletî bêro karî ser o, ferq nêkeno, bêyî DEM Partî nêbeno. Nê semedî ra ganî komelî rêxistin bikera û xora bawer ba. Potansîyelê ci derûdorê se ra 20î yo.”

	 

	Goreyê agahîyanê ke Komîsyonî pare kerdê Rayberê Şarê Kurdî Abdullah Ocalanî pêvînayîşê xo yê peyênî de qanûnê entegrasyonî ser o vinderto û heme kes û derûdoranê demokratîk ra waşto ke berpirsîyarî bigîrê.