Tutî binê lepê tiryakî, emnîyet û zîndanî de yê 2025-12-01 11:17:55     Melîke Aydin   MUGLA – A.B da zanayîş ke tutan teşwîqê sucê tiryakî, rotişê tiryakî, xesp, talan û dizdî yenê kerdiş û va sazîyê dewlete tutan nê, gumanbaran pawenê.   Goreyê malûmatê 2024ine yê Serekîya Têkoşînê Hemverê Sucê Narkotîkî yê Midûrîyê Pêroyî yê Asayîşî Tirkîya emrê destpêkerdişê şuxilnayîşê tiryakî se ra 22,45 o û eynî wextî de emrê şuxilnayîşî kewto binê 15 serran.   Cinîya bi nameyê A.B.ya ke Mugla de ciwîyena, derheqê tutê xo yê 15 serre ke dest bi tiryakî kerd qisey kerde. A.B. va, tutî hetê hevalanê xo yê ke eynî emrî de yê kewenê na dafike. A.B wina va: “Tutanê kênekan ser o semedê tiryakî fuhuş yeno fezkerdiş. Asayîş zî na babete de tu çî nêkeno.”   ‘15 serre dest bi tiryakî kerd’   A.B wina va:   “Tiryakî roşenê tutanê 10 serran rê zî. Rotox bi sebebê ‘ke şuxilnenê’ yeno veradayîş. Lajê mi 15 serre bî kewt mîyanê lepê tiryakî. Lajê mi serkewte bî. Sinifa 8ine ra pey nêame keye. Ez kuçeyan lajê xo gêrayêne. Senîn mi dîne, remayîne.”   Tehdîdê merdişî girewte   A.B va, bi desine rey şîya qerekol û hetê gumanbaran ra ameya tehdîdkerdiş û va: “Qerekol hetkarî nêkerd. Mi lajê xo zî gerre kerd. Qerekolî va,ê pey maseyanê girdan ê, pey yê qijan nîyê. Ez semedê lajê xo şîya dadgehe, mi semedê dermankerdişê ey waştişname nusna. Çareyê ma çin o. Mi xo resna kesanê ke tiryak danê lajê mi. Vatî, ti xo bide het. Ez tehdîd kerda.”   ‘Ma polîsan ra nêtersenê, dewlete piştîya ma de ya’   A.B. da zanayîş ke aşmêke verê lajê aye bi zor berdê û va: “Lajê mi va, dayê fek mi ra verabide. Lajê mi aşmêk mabêne daye. La kesê ke roşenê newe ra xo resnayî ey. Mi nê ser medyaya komelî de teşhîr kerd. La vatî, ‘ma nêtersenê, dewlete piştîya ma de ya, şo ma gerre bike’. Pêwa mi gumanbaran teşhîr kerdî zî, gumanbaran lajê mi berd. Cil û belgê, nasnameyê ey ey ra girewtî. Tehdîdê giranan kerdî. Mi cilê lajê xo berdî asayîş, la çi heyf tu çî nêkerdî. Mi muracatê CÎMERî zî kerd la tu netîce nêame girewtiş.”   ‘Tutanê kênekan kenê mîyanê tora fuhuşî’   A.B. wina domnaye: “Lajê mi 15 rojan keye ra nêvecîya. Rojêke 3-4 kêneyê 15-16 serrî ameyî. Vatî, ma zî eynî rewşe de yê. Ma veranêdanê. Vatî, bi fuhuş tiryakî gênê. Kênekan vatî, do rojêke bêro lajê to zî semedê fuhuşî do to pêşnîyaz bikero. Zaf tutî bi esrar dest bi tiryakî kenê. Tutanê gumanbarî bi reçeteyê sûrî dermanê psîkîyatrî zî peyda kenê.”   ‘Î.Y. tutan keno mîyanê lepê tiryakî’   A.B. da zanayîş ke lajê aye teşwîqê xespî ra yeno waştiş û wina va: “Keso bi nameyê Î.Y. bi tutan kar dano kerdene. Tutanê kênekan kenê mîyanê tora fuhuşî. Lajê mi zî zaf rey tewrê pêrodayîşan bîyo.”   ‘Dewlete tu çî nêkena’   A.B. va, demo ke semedê gerrekerdişî şîya Midûrîya Şaxa Tutan ê Asayîşî aye qij ameya vistiş û va: “Mi cilê bigonî ê lajê xo berdî asayîş. Mi nameyê gumanbaran da. Numareyê teberê welatî şuxilnenê. Mi CÎMERî rê nusna. Mi qeydê vengî da. Dewaya ma hema domyena. Kes tutanê ma nêvîneno. Dewlete tu çî nêkena. Keye de kardî gêrewtêne û ma tehdîd kerdêne. Girewtişê ey zî çareserî nîyo. Ganî komelî rê bêrê qezenckerdiş. Lajê mi demêko kilm zîndanê Şakranî de mend. Lê no zî çareserî nîyo. Asayîşê can û malî çin o.”