DAKAP’î ra startê 25ê Teşrîna Peyêne 

2025-11-18 15:33:06


	 

	AMED - DAKAP çarçewaya 25ê Teşrîna Peyêne de semedê tepişteyê cinîyan kart şawit û va: “Heta cinî azad nêbê komel zî azad nêbeno, awankerdişê aştî û komelê demokratîk bi têkoşînê cinîyan do bêro ca.”

	 

	Platformê Cinîyan ê Dîcle Amedî (DAKAP) çarçewaya çalakîyanê 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî de verê Postexaneyê Girdî yê Sûrê Amedî de kom bî. Verê postexane de pankartê “Bi komelê demokratîk ver bi cuya azad ê bêşîdetî de” ame akerdiş û dowîzê sey “Jin jiyan azadî”, “Mêrde dano piro hukm paweno”, “Semedê Rojîne edalet”, “Edaleto erey edalet nîyo”, “Biciwîyo yewîya cinîyan” ameyî girewtiş. Eynî wextî de cinîyan resmê cinîyê ke ameyî qetilkerdiş zî eşkerayîye de berz kerdî. Cinîyan sloganê “Jin jiyan azadî” û “Bijî berxwedana jinên di zîndanan de” berz kerdî.

	 

	Metnê eşkerayîye hetê endama DAKAP’î Guneş Ozel ra ame wendiş.

	 

	Guneş Ozel dîyar kerd ke heta cinî azad nêbê komel zî azad nêbeno û wina va: “Awankerdişê aştî û komelê demokratîk do bi têkoşînê cinîyan bêro ca. Ma zaf baş zanê ke bi têkoşînê rêxistinkerde ma eşkenê xo bipawê. Ma do hemverê hêrişê kurevî bi sloganê ‘Jin jiyab azadî’ cuyêka demokratîk, azad û têduşt awan bikerê.

	 

	Ma hemverê şerî aştîyêke bi rûmet, cuyêka demokratîk, azad û têduşt pawenê. Ma do hemverê şer, şîdet, feqîrî û kedwerî pîya têkoşîn bikerê. Ma wayîrê vengdayîşê ‘Aştî û komelê demokratîk’ vejênê. Do bi têkoşînê cinîyan aştî, têduştî û azadî bêro nê welatî.”

	 

	Dimayê eşkerayîye, cinîyan kartê ke amade kerdibî semedê tepişteyê cinîyan şawit.

	 

	Dima ra zî çalakî ameye peynîkerdiş.