Cinî semedê azadîye ameyî têhet  

2025-11-17 11:29:09


	 

	STENBOL - Cinîyê ke Wareyê Azadîya Bakirkoyî de bi sloganê “Ma aştî û azadî de israr kenê” ameyî têhet, waştişê xo berz kerdî, waştişê azadîya fîzîkî ya Rayberê Şarê Kurdî Abdullah Ocalan kerdî û vatî, “BêRayberî azadî û cuyê nêbena.”

	 

	Têgêrayîşê Cinîyanê Azadan (TJA), Meclîsê Cinîyan ê Stenbolî yê Partîya Têduştî û Demokrasîya Şarî (DEM Partî), Meclîsê Cinîyan ê Stenbolî ya Kongreya Demokratîkî ya Şaran (HDK), Meclîsê Cinîyan ê Sosyalîstan (SKM), Partîya Karkeran ê Sosyalîstan ê Şorişgirû (DSÎP), Alınteri, Partîya Newe ra Awankerdişê Sosyalîstî (SYKP), Partîya Têgêrayîşê Kede (EHP) û Cinîyê Femînîstan ê Sosyalîstan zî Meydanê Azadîya Bakirkoyî de bi sloganê “Ma aştî û azadî de israr kenê” Platforma Aştî awan kerd. Bi seyan cinî, çalakî de hêvîya xo ya aştî û azadî reyke bîn ardî ziwan.

	 

	Cinîyan waştişê xo yê aştî ser pankartêk nuşt. Meydan de xeylêk rey sloganê “Jin jiyan azadî” û “Bijî Serek Apo” ameyî berzkerdiş û mesajê sereyîn lazimîya qetîkerdişê azadîya fîzîkî ya Rayberê Şarê Kurdî Abdullah Ocalanî bî. Cinîyê ke beşdarê çalakîye bîy, JINNEWS’î rê qisey kerdî.

	 

	‘Ma semedê tepişteyê sîyasî azadî wazenê’

	 

	Sevim Kılıç: Ma tîya yê ke waştişê xo yê azadî û aştî eşkera bikerê. Ma cinî her tim semedê aştî amade yê. Ma şer nêwazenê. Ma nêwazenê tu ciwanî bimirê. Ne merdişê gerîla û ne zî yê leşkeran wazenê. Ma wazenê tepişteyê sîyasî bêrê veradayîş. Ma wazenê wekîlê ma zîndanan ra bêrê veradayîş. Ma wazenê Selahattîn Demirtaş bêro veradayîş. Waştişê ma zelal o: cuyêka têduşt û azad semedê aştî yo.

	 

	Mesajê têkoşînî

	 

	Nebiye Aydogan: “Ma wazenê rayberê ma bêro veradayîş. Êdî bes o. Heme şar wazeno û waştişê veradayîşê rayberê ma kenê. Nika ma cinî zî nê wazenê. Ganî ma nê wareyî de tewr bi tewr zêdeyêr vengê xo berz bikerê. Ma do heta dilopa gonîya xo ya peyêne têkoşîn bikerê.”

	 

	‘Bawerîya ma bi dewlete çin a’

	 

	Nedret Kalkan: “Ma do her tim semedê azadîya Rayberê xo wareyan de bê. Ganî heta azadîya ey yê fîzîkî qetî nebo, kes mîyanê keyeyî de nêmano. Ganî her kes semedê azadîya fîzîkî ya Rayber Abdullah Ocalanî, semedê cinîyanê ke zîndan de tepişte yê, kuçeyan de bê. Cinî barêk giran ardê milê xo ser. Ma cinî dewlete ra bawer nêkenê. Dewlete ra tu hêvîya ma çin a. Bawerîya ma bi ma ya. Ma Rayberê xo ra bawer kenê. Ganî cinî bibê yew. Ganî cinî yewîya xo virazê û wareyan de têkoşîn bikerê.”

	 

	‘BêSerek cuye nêbena’

	 

	Emîne Aksoy: “Tena waştişêk ma est o: azadîya Rayberê ma. Eger aştî bêra, a tena Serekî dir eşkena bêra. Ma semedê heme şaran, semedê tutanê xo aştî wazenê. Bêserek cuyê nêbena. Ma azadî û aştî wazenê.”

	 

	Gulbahar Avci: “Ma serekîya xo wazenê. Ma gerîlayanê xo wazenê. Ma do serekîya xo zindanî ra vejê. Ma do heqê xo bidest bikerê.”

	 

	Cuyê Komunal

	 

	Ayhan Ay: “No proses goreyê ruhê aştî û demokrasî yo. Armancê cinîyan o oyo ke aştî û demokrasî bidest bikerê. Heta cinî azad nêbê komel zî azad nêbeno. Sloganê ma xelasîya cinîyan û aştî ya. Ma cinî semedê nê têkoşîn kenê. Demê rêxistinkerdiş û piştîdayîşê bêkêmî yo. Piştîdayîş cuyê qetî keno. Armanc û hedefê ma o yo. Heme cayan, bi taybetî mîyanê cinîyan de, komelbîyayîşêk komunal û cuyêka komunal virazê. Têkoşînê ma do nê hetî de dewam bikero.”