Hatîce Oncu: Ganî proses yew hetî nêbo 2025-11-13 09:51:49   Pelşîn Çetînkaya   AMED - Aktîvîsta TJAyî Hatîce Oncu dîyar kerd ke vengdayîşê Rayberê Şarê Kurdî Abdullah Ocalan dir prosesê newî de Têgêrayîşê Azadîya Kurdî gamê yewhetî eşt û dewlete hemverê nê gaman de bêvengîya xo pawena. Hatîce Oncu ard ziwan ke semedê domnayîşê prosesî ganî sererastkerdişê hûqûqî bêrê caardiş.   Bi vengdayîşê Rayberê Şarê Kurdî Abdullah Ocalanî yê 27ê Sibate kerd ra prosesêk newe dest pêkerd. Dimayê vengdayîşî Têgêrayîşê Azadîya Kurdî gamanê zelal eşt û nika çimî gamanê ke dewlete bierzo û qanûnê entegrasyonê ke bikerê cuye yo.   Têgêrayîşê Azadîya Kurdî 26ê Teşrîna Verêne de Qendîl de eşkerayîye da û eşkera kerd ke gerîlayanê HPG û YJA Starî yê Tirkîya vejiyenê Qadê Pawitişê Medyayî. Aktîvîsta TJAyî Hatîce Oncu derheqê babete de ercnayîş kerd.   Hatîce Oncu ard ziwan qerarê Têgêrayîşê Azadîya Kurdî zaf muhîm o û wina domna: “Têgêrayîşî va heme hêzê xo Tirkîya ra vejeno. Na game tesîrêk gird kerd. Eynî vengdayîşî de ame dîyarkerdiş ke proses kewto sewîyeya dîyine û vengdayîşê têkoşînî şarî rê ame kerdiş. No zaf muhîm o. Birêz Abdullah Ocalan û merdimê kurdî gamanê girdî eştî. Vengdayîşê ‘Aştî û Komelê Demokratîkî’ dir proses nasnameyêk qezenc kerd.     ‘Gamê ke ameyê eştiş nîşaneyê zelalbîyayîşî yê’   Hatîce Oncu dîyar kerd ke proses de gamê yewhetî ameyî eştiş û berpirsîyarî tena yew hetî ser o ameyo dayîş. Hatîce Oncu wina va: “Pey vengdayîşê 27ê Sibate 1ê adare de PKK’yî agirbest îlan kerd û dimayê kongreyî qerarê feshkerdişî da. Birêz Abdullah Ocalan proses domneno. La heto bînî ra gamê PKK û şarê kurdî zaf muhîm o. Gamê ameyê eştiş qerar û zelalbîyayîşê hemverê prosesî yê.”   ‘Ganî dewlete zî gaman bierzo’   Hatîce Oncu ard ziwan semedo ke proses baş bidomyo ganî Rayberê Şarê Kurdî Abdullah Ocalan dir pêvînayîş bêrê kerdiş û va: “Persê ‘proses do yewhet bidomyo’ sereyê ma de yo. Bêguman ganî dewlete gaman bierzo. Bi 8 aşmî yo yewhete gamî yenê eştiş. Belê komîsyonêk ame viraştiş. No muhîm o. La çîyo muhîm no yo ke komîsyon hema Birêz Ocalanî dir pêvînayîşêk nêkerd. Berpirsîyarî kewenê milê her kesî ser. Ganî her kes bi ruhê seferberî têkoşîn bikero.”