Hemşaredara ke qeyûm vera aye tayîn bi: Ma peyser game nêeşt!

2025-10-27 11:21:53


	 

	 

	Gulistan Gulmuş

	 

	RIHA – Hemşaredara Xelfetîye Saniye Bayram ke qeyûm tayînê cayê aye ame kerdiş, dîyar kerd ke pêwa qeyûm ameyo tayînkerdiş zî peyser game nêeştê, mîyanê şarî de ca girewtê û xebatan donnayê.

	 

	31ê adare 2024î de weçînayîşê herêmî de Partîya Têduştî û Demokrasî (DEM Partî) zaf şaredarîyan girewt. La dima ra bi zaf sebeban îradeyê şarî ame xespkerdiş û qeyûmî hîn şaredarîyan rê ameyî tayînkerdiş. Nê şaredarîyan yewe zî şaredarîya Xelfetîya Rihayî bî. 4ê teşrîna peyêne 2024ine de qeyûmî, şaredarîya Mêrdîn, Êlih û Xelfetîye rê ameyî tayînkerdiş. Qeyûmî ameyî tayînkirdiş la hemşaredaran xebatanê xo domnayî.

	 

	Hemşaredara Xelfetîye Saniye Bayram ke qeyûm tayînê cayê aye bi, derheqê prosesî de qisey kerd.

	 

	‘Qeyûman tîya de çîyêk nêverda’

	 

	Saniye Bayram dîyar kerd ke îradeyê şarî verê zî ameyo xespkerdiş û wina va: “Zaf cayan de qeyûm ame tayînkerdiş la Xelfetîye de xeylê cîya bî. Ma 2014ine de tîya de şaredarî girewt la 2016ine de reyna qeyûm amey tayînkerdiş. 8 serrî tîya de îdareyê qeyûmî bî. Qeyûman tîya de çîyêk nêverda. Xelfetîye debara xo bi fistikan kerdêne. La daranê 50-60 serrî heme rotî. 800 parsel ca rotî. Îradeyê Xelfetîye xesp kerdî. Her reya ke qeyûmî yenê ma zî xurt benê. 2016ine de wexto qeyûm ame tayînkerdiş birayê mi hemşaredar bi. Dima ra destbend kerdî û di aşmî dima ra ez bîya hemsereka qeza. Emnîyetê tîya va ‘ma qeyûm tayîn kerd, ma şima girewtî, şima reyna benê şaredar?’. Mi zî va ‘Her wexto şima zehmetîyan vernîya ma de vêjenê ma xurtêr benê.’ Wa êdî îradeyê nê şarî xesp nêkerê. Na qeza weş bî, pak bî, la her tewir lêşinî kerdî qeza, tiryakî kerdî qeza.”

	 

	‘Nêwazenê tîya aver şêro’

	 

	Saniye Bayram va ke netîceyê tayînkerdişê qeyûman dir zaf problemî vejîyayî werte û nê çî va: “Çend aşmî verê cû reyna qeyûm tayîn kerdî. Sektorê tîya wêran kerdî. Her kes kewt pey pereyê tarî. Kes ne îmar, ne zî ruhsat dano. Çike Xelfetîya verê binê awe de menda tîya de Xelfetîyêke newe awan kenê. Nêverdenê tîya aver şêro. La roja ke qeyûmî ameyî tayînkerdiş ma keyeyê xo de nêroniştî. Ma her ca de qeyûman deşîfre kenê. Wa fek tîya ra vera bidê, ma şarê xo rê xizmet bikerê. Weçînayîşan de 5 hezar weçînitoxî ardî tîya. Ma înan deşîfre kerdî.”

	 

	‘Ma peyser game nêeşt’

	 

	Saniye Bayram peynîya qiseykerdişê xo de eşkera kerd ke pêwa tayînkirdişê qeyûman ma xebatanê xo kuçe bi kuçe domnayî û prosesê muzakereyî de ganî gamî bêrê eştiş. Saniye Bayram wina temam kerd: “Bi serrêke yo no prose dest pêkerdo. Heme sîyasetmedarî zerre de yê. Zaf tepişteyê nêweşî est ê. Prosesêk ame dest pêkerdiş, mesele berdî meclîs. La hîna zaf tepişteyî zîndanan de yê. Vatî ke do qeyûman peyser bikerê la nêkerdî. Wa ma nêxapênê. 7-8 aşmî yo qeyûm tayîn kerdî. Ma game peyser nêeşt. Ma semedê şarê xo têkoşîn kenê. Ma mîyanê şarê xo de yê. Ma 45 kombîyayîşî kerdî. Ma her kesî dir ameyî têhet. Ma bedelê pîlî da. Êdî wa gamî bêrê averberdiş. Wa no şar înan ra bawer bikero.”