‘Waştişê ma yê pêvînayîşê Birêz Ocalanî dir meşrû yo’  

2025-10-16 10:55:04


	 

	AMED - Cinîyê ke bi sloganê “Ma bi hêvî ver bi azadîye rayîr ra şinê” Amed ra rayîr ra şî Anqara, waştişê aştiye û çareserîya demokratîke berdî meclîs. Hemsereka Dêrsimî Bîrsen Orhan ke tewrê rayîrşîyayîşî bî wina va: “No rayîrşîyayîş de temsîlkarîya cinîyan vejîya vernî. No rayîrşîyayîş îfadeyê waştişê viraştişê heqê hêvîye û waştişê pêvînayîşê Birêz Ocalanî dir bî.”

	 

	Bi serkêşîya Têgêrayîşê Cinîyanê Azadan (TJA), cinî ameyî têhet û 1ê teşrîna verênê de Amed ra ver bi Anqara bi sloganê “Ma bi hêvî ver bi azadîye rayîr ra şinê” dest bi rayîrşîyayîş kerdî. Cinîyan 7ê teşrîna verênê de Anqara de rayîrşîyayîşê xo qedênayî. Cinîyan meclîs de bêmabêne sloganê “Bijî serek Apo” berz kerdî û waştişê azadîya fîzîkî ya Rayberê Şarê Kurdî Abdullah Ocalanî kerdî.

	 

	Hemsereka Dêrsimî Bîrsen Orhan ke qeyûm vera aye ame tayînkerdiş, rayîrşîyayîşî de ca girewte û derheqê mesela de ercnayîş kerd.

	 

	‘Waştişê ma yê pêvînayîşî Birêz Ocalanî dir estbî’

	 

	Bîrsen Orhan da zanayîş ke bajarê Kurdistanî heta bajarê Tirkîya bi sloganê “Ma bi hêvî ver bi azadîye rayîr ra şinê” şarî dir ameyê têhet û bi taybetî nê prosesî de waştişê cinîyan ê prosesî ra ameyî goşdarîkerdiş. Bîrsen Orhan wina dewam kerd: “Xeylêk rayîrşîyayîşî ameyî kerdiş la no rayîrşîyayîş cîya bi. Xoserîya ci estbî. Temsîlkarîya cinîyan vejîya werte. Bi taybetî hûmara cinîyanê ciwanan zaf bî. Ma çira no rayîrşîyayîş viraşt? Armancê rayîrşîyayîşê ma no bî ke heqê hêvîye bibo. Ma komîsyono ke ame awankerdiş ra waşt ke aktorê prosesî dir pêvînayîşî bêrê kerdiş. Ma waşt ke nê prosesî de nêtewîyî werte ra wurzo, mîmarê prosesî Birêz Ocalanî dir pêvînayîşî bêrê kerdiş.”

	 

	‘Ganî komîsyon helwestê meşgulkerdişî ra fek vera bido’

	 

	Bîrsen Orhan va ke rayîrşîyayîş de xeylê astengîyan dir rî bi rî ameyê û wina dewam kerd: “Teberê heme astengîyan de cinî rayîr ra şî. Awankerdişê komîsyonî xeylê bi qîymet o. Semedê aştîye muhîm o. La şar wazeno ke gamê pozîtîfî bêrê eştiş. Tenya şarê kurdî nê, heme şarî nê wazenê. Nê prosesî de ganî komîsyon helwestê meşgulkerdişî ra fek vera bido. Rayîrşîyayîşê ma yê ke viraşt de, şarî nê timûtim ard ziwan.”

	 

	‘Ganî komîsyon cinîyan goşdarî bikero’

	 

	Bîrsen Orhan eşkera kerd ke 27ê sibate ra prosesêk aştîye yeno kerdiş û nê va: “Komîsyono ke ame awankerdiş ganî lezkî cinîyan goşdarî bikero. Komîsyon xeylê sazgehan goşdarî keno. No çîyêk baş o. La ganî nika goşdarîkerdişî derbas bikero û gamê somutî bêrê eştiş. Ma bi rayîrşîyayîşê xo meclîs de eşkerayîyêk da, hemverê nê zî bêtehemulî estbî. Ma va, ma sey cinî rayîrşîyayîşêk viraşt û ganî şima cinîyan goşdarî bikerê. Ma dosyayêk da komîsyonî. Ganî komîsyon dayîkê ke tutû xo vînî kerdî, cinîyan goşdarî bikero, tenya bi goşdarîkerdişî nêmano, prosesî lez bikero.”

	 

	‘Rayîrşîyayîşêk derg’

	 

	Bîrsen Orhan va ke teberê astengîyan de rayîrşîyayîş resayo armancê xo û wina qedêna: “Nêeşkenê vengê ma bibirnê. No rayîrşîyayîş de temsîlkarîya cinîyan vejîya vernî. No rayîrşîyayîşo ke cinîyan temsîlkarîya xo ard ziwan, rayîrşîyayîşêk derg bî ke prosesî îfade keno. Netîceya têkoşînê cinîyan de cinî meclîs de ameyî goşdarîkerdiş. Ma bawerîya xo ya bi aştîye tu wext vînî nêkerd. Proses de ganî her kes berpirsîyarîyê xo bigîro xo ser.”