‘Binpaykerdişê heqan ê zîndanan zirar dano proses’

2025-09-17 10:34:38


	  

	 

	ANTALYA - Ezgî Akbaş dîyar kerd ke zîndanan de  binpaykerdişê heqan her ke şinê giran benê û va ke îqtîdar îradeyê çareserî bi nêzdîyê hemverê tepişteyê sîyasî eşkeno bido werte.

	 

	Zîndanê Tîpê Syê Manavgat û Tîpa Lyê Alanyayî de binpaykerdişê heqan ê bêhuqûqî yê hemverê tepişteyan dewam keno. Tahlîyekerdişê tepişteyê cinîyan bi qerarê Heyetê Îdarî û Taqîbkerdişî (ÎGK) yenê astengkerdiş û sewqê tepişteyê nêweşan nîno kerdiş yan zî sewqkerdişî de kelepçe yeno ferzkerdiş.

	 

	Hemverfeka Komîsyonê Zîndanan ê Komeleya Huqûqnasê semedê Azadîye (OHD) Ezgî Akbaş derheqê binpaykerdişê heqan yê zîndanê Antalya de qisey kerd.

	 

	'Dermankerdiş û tahlîyekerdiş yeno astengkerdiş'

	 

	Ezgî Akbaş dîyar kerd ke binpaykerdişê heqan ê zîndanan bi hawayêko sîstematîk yeno kerdiş û va: “Xoresnayîşê heqê weşîye, hîjyen, caardiş tecrîdî, dergkerdişê înfazan. Rewşa tepişteyê nêweşan zaf giran o. Zîndanê Tîpa Syê Manavgatî de tepişteya bi nameyê Neslîhan Çetîn ganî bi rêk û pêk şêro fîzoterapî. La zîndan sewqê aye asteng keno, heta nêkeno. Wexto ke berê zî cot kelepçe ferz kenê. No zî heqê dermankerdişê binpay keno û rumetê merdiman şikneno. Tuba Sert tepişteya muebetê giran a. Zîndanê Tîpê Syê Manavgatî de manena. Şertê tecrîdî de yena verdayîş. Laleş Çelîket 28 serrî yo tepişte ya. Dosya aye hîrê rey ameya xirakerdiş la hema tepişte yena verdayîş. No hemverê heqê muhakemekerdişê adîlane yê peymanê mîyanneteweyî yo.”

	 

	‘Tahliyekerdişê tepişteyan yeno astengkerdiş’

	 

	Ezgî Akbaş wina dewam kerd: “Tepişte Zozan Cimo  Tîpê Lyê Antalya de manena. Hetê heyetî ra tahlîyeyê aye yeno astengkerdiş. Hatîce Çakmak zî eynî zîndanî de ya. Bi sebebê cezayê dîsîplînî tahlîyeyê aye zî yeno astengkerdiş. Tepişte Nurjen Tekîn zî zîndanê Tîpê Syê Manavgatî de manena. Tahlîyeyê aye zî hîrê aşman yeno dergkerdiş. Sazgehê Tipê Edlî zî xeylê rey objektîfbîyayîş û xoserbîyayîş ra durî raporan amade kenê û bi nê raporan zî tahlîye yenê astengkerdiş. Nê dir sînor nêmanenê. Heqê cuya tepişteyê nêweşan zî yena binpaykerdiş.”

	 

	'No qerar zirar dano proses'

	 

	Ezgî Akbaş tewr peyîn wina va: “Hetêk ra vanê aştî û çaeserî la heto bîn ra zî caardişan tepişteyan ser o dewam kenê. No hetê samimîyetê prosesî de xeylêk muhîm o. Ganî lezkî nê caardişê keyfî werte ra bêrê wedaritiş. Îqtîdar îradeyê çareserî bi nêzdîbîyayîşê hemverê tepişteyê siyasîyan eşkeno vejo werte.”