‘Wa kes kesî meşgul nêkero’ 2025-09-15 10:10:48   STENBOL - Cinîyan derheqê prosesê awankerdişê komelê demokratîkî de fikrê xo ardî ziwan û wina vatî: “Wa çareserî hema pê bêro. Wa kes kesî meşgul nêkero. Kes şerî ra qezenc nêkeno, aştî zî vînî nêkena. Ziwanê ma xeta ma ya sûr a.”   Bi vengdayîşê ‘Aştî û komelê demokratîkî’ ke Rayberê Şarê Kurdî Abdullah Ocalanî 27ê Sibate de kerd de, problemê ke polîtîkayê şerî dir giran bî, paweyê çareserî yê. Yew nînan ra meseleya ke bi serran o dewam kena, pênêameyîşê statuya semedê kurdî ya û nêbîyayîşê ziwanê fermî yo. Têkoşînê nê bi serran o dewam keno û dimayê 27ê Sibate dima semedê çareserî vengdayîş yeno kerdiş. Cinî derheqê babete de fikrê xo ardî ziwan.   ‘Kes aştî ra vînî nêkeno’   Zubeyde Înce dîyar kerd ke zextê kurdî ser o dewam kenê û va: “Bi serran o ziwanê kurdan yeno qedexekerdiş. Qaşo semedê çareserîya meseleya kurdî, komîsyon ameyo awankerdiş. La Dayîkê Aştîye komîsyon de nêeşkayî bi ziwanê xo qisey bikerê. Awankerdişê komare de yew ziwan, yew netew yeno ferzkerdiş. Birêz Ocalan roportajêk xo de va, ez muxatab gêna. Werrekna o wext muxatab bibayîne û komîsyonêk wina biameyîne awankerdiş. A roje ra do nê dejî nêameyîne ciwîyayîş. Xeylêk problemê ma est ê. Yê perwerde, weşî, ekonomî. Her çî qedênayî. Gule merdiman kişeno. Aştî dana ciwîyayîş. Şer çîyêk nêdano qezenckerdiş. Aştî dana ciwîyayîş. Kes aştî ra vînî nêkeno. Semedê aştî ganî her kes berpirsyarî bigîro. Ganî çareserî hema pê bêro. Wa kesî meşgul nêkerê. Êdî bes o. Wa nê dejî nêrê ciwîyayîş.”   ‘Ziwanê ma xeta ma ya sûr a’   Mercan Gul ke Komeleya Cigêrayîşê Kurdî de mamoste ya wina va: “Ma wazenê bi ziwanê xo bibê, bi ziwanê xo bifikrîyê û biciwîyê. Semedo ke ma cuya xo ziwanê xo ser bîyaye bikerê, ganî ma perwerdeyê bi ziwanê xo bigîrê. Ma cayêk bîn ra nêameyê tîya. Ma na herre ser o ameyê dinya. Ma tîya bî, Mezopotamya de bî. Semedo ke ma qalê aştî bikerê ganî vernê de ziman nas bikerê. Ganî ma bi ziwanê xo perwerde bivînê. Ma fek ziwanê xo ra vera nêdanê. Ziwan xeta ma ya sûr a.”