‘Eke aştî pê bêro do qetilkerdişê cinîyan zî peynî bibo’ 2025-08-18 09:10:19   RIHA - Cinîyê Rihayî bale antî serê şîdet û qetîlkerdişê cinîyan yê her ke şinê zêde benê û dîyar kerdî ke rewşa ke aştî pê bêro, do vernîya qetilkerdişê cinîyan zî bêro padayîş.   Şîdetê cinîyan ser her ke şino zêde beno û semedê polîtîkayê bêcezaverdayîşî yê dewlete şîdetê cinîyan ser her ke şino giran beno. Cinîyê ke tewrê şayîya ‘aştî û komelê demokratîkî’ yê Wêranşarê Rihayî yê 10ê tebaxe de pê amebi bî, derheqê şîdet, zext û qirkerdişê hemverê cinîyan de qisey kerdî û bale antî serê muhîmîyê awankerdişê ‘aştî û komelê demokratîkî’.   ‘Aştî do vernîya şîdetî pado’   Endama Meclîsê DEM Partî Çîftçî Goztepe bale ant serê qetilkerdişê cinîyan û wina va: “Peymana Stenbolî semedê cinîyan dêsêk xurt bî. La çi heyf peymane wedaritî. Nê destê zîhniyetê serdest yê camêrdan xurt kerd. Cezayê bi tesîr nînê dayîş. Ganî semedê hişmendîyê komelî xebatî bêrê kerdiş. Ganî cezayê bi tesîr bêrê dayîş. 2000î ra heta nika qetilkerdişê cinîyan zêde bî. Dimayê vengdayîşê 27ê Sibate gamê aştîye yê ameyê eştiş do xeylêk vurnayîşê pozîtîfî zî xo dir bîyarê. Aştî do vernîya şîdetê cinîyan ser pado. Cinî azad bê do komel zî azad bo.”   ‘Cinî semedê sîstemî yenê qetilkerdiş’   Emîne Çîzîk zî wina va: “Qetilkerdişê cinîyan girêdayîşê sîstemê bîyaye yo. Ma hemverê şîdet û qirkerdişê cinîyan ê. Sebebê qetilkerdişê cinîyan sîstem o. Ciwanî semedê sîstemî tîryakî şuxilnenê, kewenê fuhuş. Sîstem nêwazeno cinî tewrê sîyasetî bibê. Ma wazenê vernîya nê padê. Ma aştî û têduştî wazenê.”   ‘Ganî zîhnîyet bivuryo’   Îdarekara DEM Partî ya Serêkanîye Salîha Şîmşek zî dîyar kerd ke demê peyîn de qetilkerdişê cinîyan zêde bîyo û Salîha Şîmşek wina va: “Wexto ke bêro waştiş komel bêro çinkerdiş, vernê de cinîyan çin kenê. Nê semedî ra vernê de cinî û tutî hedef yenê girewtiş. Semedê vernîya nînan bêro padayîş, ganî no zîhnîyet bivuryo. Ma wazenê komelê demokratîk awan bikerê. Ganî rêxistinbîyayîş bibo. Ganî ma komun û meclîsê xo awan bikerê.”